Muzikanti i njohur amerikan “Prince” zhvilloi një koncert para mijëra njerëzve në Baltimore, pas protestave të fundit dhe trazirave që ndodhën me vdekjen e një të riu afrikano-amerikan (Freddie Gray), fakt që në qytet solli edhe një shtetrrethim.
Koncerti i titulluar “Rally 4 Peace” u zhvillua të hënën në arenën “Royal Farms”, pak kilometra nga vendi ku ishte epiqendra e dhunës në fund të prillit.
“Prince” e ka quajtur këngën e tij të re “Baltimore”, për nder të qytetit me të njëjtin emër, e në këngë është përmendur dhe Fred Gray, i riu i cili vdiq ndërsa ishte në paraburgim në policinë e Baltimore, madje edhe afrikano-amerikani, i cili u qëllua nga policia vitin e kaluar në Misuri, Michael Braun.
Këngëtari ftoi në skenë dhe një avokate të re nga Baltimore, Marilyn Mosby, e cila solli akuza kundër gjashtë oficerëve të policisë të përfshirë në vdekjen e Gray.
“Pa drejtësi nuk mund të ketë paqe,” porositi 57-vjeçari, i cili veç angazhimit me këngët e reja solli edhe klasiket e veta, duke përfshirë të pashmangshme “Purple Rain”.
Në koncert, i cili zgjati rreth dy orë e gjysmë, audienca me kërkesën e “Prince”, erdhi e veshur me veshje gri. Performoi edhe banda e funk-rock “3RDEYEGIRL”. Një pjesë e të ardhurave nga koncerti ka për qëllim të shkojë për organizatat humanitare për të ndihmuar të rinjtë në Baltimore. Princi është i njohur për gjërat e veta të çuditshme. Emri i tij i vërtetë është Prince Rogers Nelson, por 1993-2000 u përfaqësua me një simbol që përshkruhet si një “simbol i dashurisë”.
Është i përfshirë në Rock dhe Roll Hall of Fame që prej vitit 2004. Kurse revista “Rolling Stone” e ka vendosur në vendin e 27 në listën e “100 artistëve më të mëdhenj të të gjitha kohërave”.
