Primaret që nxorën në pah problemin primar të PD

Nga Denis Dyrnjaja

Sot PD përballet me një realitet që në tërësinë e tij ose fshihet ose tentohet të manipulohet përballë opinionit publik. Njerëzit përfaqësues të partisë më të madhe opozitare, që kërkon të rimarrë pushtetin pas 12 vitesh, janë të padëshiruar nga vetë baza dhe anëtarësia demokrate.

Kjo u shfaq dukshëm në garën paraprake për të zgjedhur kandidatët që do të konkurrojnë në zgjedhjet e 11 Majit. Shkaqet janë disa syresh, por ndër më kryesorët është humbja ndër vite e kriterit të meritokracisë, që thënë ndryshe janë katapultuar në parti në nivele drejtuese e përfaqësuesese, njerëz që janë të papëlqyer nga publiku, por kanë ecur dhe ekzistuar falë besimit aforfe të lidershipit të drejtuar nga Berisha deri në 2013, pastaj nga Lulzim Basha e sërish nga Berisha në vijim.

Ky është një realitet që në PD ose nuk duan ta kuptojnë ose nuk duan ta pranojnë. Mungojnë njerëzit e pëlqyer dhe karizmatikë ose janë me pikatore. Nuk duhet ngatërruar fakti nëse këta individë janë njerëz pozitivë apo të angazhuar me punë partie. Është fjala për një kategori tjetër njerëzish që prodhojnë simpati në publik dhe jo acarim deri në neveri në disa raste Një parti që dominohet nga figura të papëlqyera, jopopullore e të pasimpatizuara, madje në të kundërt shpesh edhe antipatike në sjellje e komunikimin publik, kanë krijuar një ulje drastike të popullaritetit të partisë në tërësi.

Psh nëse mbledh votat e 5 kandidatëve më të votuar në Tiranë, nuk bëjnë as shumatoren për të nxjerrë një deputet të vetëm. Ndërsa rasti më dëshpërues është ai i zëdhënëses së PD znj Floriana Garo që megjithë prezencën e vazhdueshme dhe të shtuar të saj në publik përkrah kryetarin Sali Berisha, ka marrë një minimum telendisës votash në primare, që tregon se jo gjithçka që i pëlqen kryetarit iu pëlqen edhe demokratëve e për më tepër votuesve në tërësi që duet te zgjedhin nëse duhet të mbajnë përsëri Ramën kryeministër apo të sjellim përsëri Berishën në qeveri.

Kjo që po ndodh dhe ky realitet dëshpërues në PD, nuk është një rrufe në qiell të pastër por pasojë e humbjes së demokracisë dhe manipulimit të proceseve të brendshme në PD për vite me radhë, që kanë prodhuar pseudopersonalitete politike apo qenie politike epruvetash që janë në fakt inflacioni politik i një partie që vijon të parashikruajë humbjet e saj elektorale njëra pas tjetrës.

Deri në ditën kur ky realitet të pranohet, PD do rreket në vetsugjestionin e saj, se është gati për të ardhur në pushtet. Këtë e dinë shumica e demokratëve në bazë dhe në kupolën drejtuese, por nuk u pëlqen ta pranojnë sepse u intereson më shumë vetja dhe ekzistenca e tyre se partia.

Ndaj për pushtetin e Edi Ramës nuk punon vetëm PS, por kontribuon thellësisht edhe vetë PD. Vota e primareve ishte një leksion që përsëri as Berisha dhe as servilët e tij nuk duan as ta lexojnë dhe as ta pranojnë.