Protagonizmi i saj në skenën e madhe të “Ariston” në Sanremo, u kthye në kryefjalën e mediave të huaja, e kryesisht atyre italiane. Artikuj të dedikuar, kolazhe fotosh dhe qëndrime të shprehura publikisht në media, për Alketa Vejsiun që prezantoi natën e tretë “Sanremos”, bashkë me Amadeus dhe showgirl-in Georgina Rodriguez.
“Një triumf i karrierës sime profesionale”, e konsideroi që në krye të herës Alketa, pjesëmarrjen e saj në magjinë e festivalit më të madh të muzikës italiane siç është “Sanremo” prej dekadash, ndërkohë që zbriste shkallët e teatrit “Ariston”, shkallë të cilat në fakt i konsideroi si ngjitjen drejt kulmit dhe arritjeve profesionale.
E veshur me një fustan në nuancë rozë nga Dolce&Gabbana dhe një grim të kuruar dhe në tonalitete të lehta e të pastra, Alketa nuk e fshehu për asnjë moment vlerësimin dhe emocionin që gjendej në skenën që e kish ëndërruar qysh fëmijë.
Me të folurën e saj të shpejtë dhe elokuente, një cilësi që shqiptarët ja njohin, por që me sa duket i ka habitur pa fund italianët dhe gjithë kastin e artistëve dhe të ftuarve special që kishin mbushur sallën e “Ariston”, pjesëmarrja e Alketa Vejsiu jehoi në të gjitha mediat botërore, e veçanërisht ato italiane.
“Një uragan”, e ka etiketuar shtypi i huaj duke ju referuar të folurës së saj të shpejtë, aq sa u duk një moment sikur “eklipsoi” edhe vetë Amadues-in, i cili e shprehu habinë e tij me zë të lartë: “Unë nuk kam parë prezantuese tjetër të flasë kaq shpejtë”, duke ju drejtuar Alketës teksa bashkëprezantonin “Sanremon”!
“Vullkanike, energjike, uragan”, ishin titujt që domonin shtypin e huaj sot, çka dukshëm le të kuptohet se Alketa Vejsiu ka “rrëmbyer” gjithë vëmendjen e italianëve dhe mediave botërore me pjesëmarrjen e saj në natën e tretë “Sanremos”, ku krahas prezantimit, ajo ndau me të gjithë edhe një monolog të ndjerë e me mesazhe të forta nga historia e saj e jetës, tek Shqipëria, emigrimi, toka e premtuar dhe shembujt e suksesit 100% shqiptar siç është edhe këngëtari Ermal Meta.
Më pas, ajo interpretoi një nga këngët e preferuara “Una lacrima sul viso” së bashku me këngëtarin e njohur italian Bobby Solo, duke u duartrokitur gjatë nga të ftuarit dhe të pranishmit special në sallën e pallatit “Ariston”! / class.al
g.kosovari
