15.401 armë të vogla dhe të lehta të konfiskuara ose të grumbulluara përmes fushatave të vazhdueshme të sensibilizimit janë demontuar në Uzinën Mekanike në Gramsh.
Ky proces pune u inspektua nga zëvendësministrja i Mbrojtjes Dallëndyshe Bici, zëvendësministër i Brendshëm dhe kryetar i Komisionit Kombëtar të AVL (Armëve të Vogla dhe të Lehta) Besfort Lamallari, anëtarë të Komisionit Kombëtar të AVL nga institucione të ndryshme dhe agjenci të pavarura, përfaqësues nga ambasada.
Zëvendësministrja e Mbrojtjes, Dallëndyshe Bici vlerësoi se shkatërrimi i armëve ilegale kontribuon në rritjen e sigurisë së vendit tonë: “Ne si Ministri e Mbrojtjes dhe Ministri e Brendshme, por edhe Komisioni Kombëtar për AVL-të përforcojmë mesazhin rreth rrezikut që armët e zjarrit të pakontrolluara paraqesin për sigurinë e individëve, sigurinë e shoqërisë dhe stabilitetin e rajonit” – u shpreh zëvendësministrja Bici.
Ajo nënvizoi më tej faktin se bashkëpunimi shumë i mirë mes institucioneve tona në përmirësimin e legjislacionit, do të vazhdojë në të ardhmen në të gjithë komponentët e strategjisë, si në luftimin e trafikut të paligjshëm nëpërmjet rritjes së sigurisë kufitare detare, në shkatërrimin e armëve të tepërta, në përmirësimin e kushteve të sigurisë të depove të armatimeve dhe në sensibilizimin e popullatës për rreziqet e këtyre armëve.
Ndërkaq, zëvendësministri i Brendshëm Besfort Lamallari theksoi se informimi për procedurat e ndjekura shërben si një fushatë ndërgjegjësimi dhe transparence.
“Ky është një proces, i cili garanton sigurinë nga risqet e magazinimit apo ruajtjes së tepricave të armatimit dhe municionit të dalë jashtë përdorimit apo atij të grumbulluar nga sekuestrimet dhe provat materiale, duke sjellë në vëmendje faktin se, armët e vogla dhe të lehta, municionet e tyre dhe eksplozivët, nëse nuk kontrollohen, mund të paraqesin kërcënim për sigurinë e brendshme dhe më gjerë” – u shpreh Lamallari.
Aktiviteti u mbyll me një demonstrim mbi shkatërrimin e armëve të vogla dhe të lehta të sekuestruara.
Shqipëria është vendi i parë në rajon që shkatërroi i pari, armët e trashëguara nga sistemi i kaluar.
