EKSKLUZIVE/ Janë dy emra që kanë shkaktuar një stuhi politike në Durrës, duke i dhënë njëkohësisht opozitës, një ndër “provat” materiale për trukimin e rezultatit të zgjedhjeve në qytetin bregdetar. PD ka pretenduar se dy shtetas shqiptarë, të cilët figurojnë si votues në 21 qershor në garën për bashkinë e Durrësit, nuk kanë qenë fare të pranishëm në zgjedhje. Pra, është votuar në emër të tyre, por nuk kanë votuar ata vetë. Cila është e vërteta e këtij pretendimi?!
Dy personat, emrat e të cilëve kanë dalë nga kutitë e votimit të bashkisë Durrës sikur kanë votuar në 21 qershor, quhen Ermion Arapi dhe Jeton Bajrami. Ata janë banorë të lagjes 18 në Durrës dhe janë regjistruar në qendrën e votimit nr 1437, e cila është ngritur në kopshtin “Soros”. Pas një hulumtimi të thjeshtë, rezulton se që të dy personat kanë qenë në Durrës ditën e zgjedhjeve dhe kanë votuar, si shumë bashkëqytetarë të tyre. Të kontaktuar, ata shprehen të çuditur se nga kanë dalë pretendimet, për mospraninë e tyre në zgjedhje. Sepse ata vetë shprehen se atë ditë kanë qenë në Shqipëri, madje kanë votuar si mijëra bashkëqytetarë të tjerë durrsakë.
Ja çfarë thonë vetë protagonistët e kësaj historie! Ermion Arapi thotë se: “Dje e dëgjova këtë gjë, më morën në telefon shokë dhe miq dhe në në fillim po bënim humor. Nuk e kuptoj se si deklarojnë gjëra të tilla. Unë kam votuar bashkë me pjesën tjetër të familjes, në fund kam qenë unë me prindërit që votuam, madje kisha me vete edhe vajzën 5-vjeçare. Në qoftë se ata që pretendojnë se unë kam votuar pa qenë në Shqipëri, por nëse do të kishin kontrolluar, nuk do e kishin thënë këtë gjë. Të gjithë anëtarët e qendrës së votimit ku kam votuar, të majtë dhe të djathtë, më njohin mirë dhe më panë kur unë votova normalisht. Ja ku duket edhe shenja e bojës në gisht, e cila është rritur bashkë me thoin”.
Jeton Bajram është një tjetër votues, që sipas pretendimeve të opozitës, ka votuar pa qenë në Shqipëri në 21 qershor, thotë se: “U çudita kur mora vesh një gjë të tillë, sepse unë kam qenë këtu dhe votova normalisht. Kam votuar ditën e diel pasdite, vetëm, sespe pjesa tjetër e familjes votuan që në mëngjes. Unë jam pjesë e Fondacionit të Qendrës Kristiane në Durrës dhe një nga drejtuesit e tij. Në mëngjes kishim shërbesat tona fetare dhe ky është shkaku që nuk votova bashkë me familjen. Kjo është hera e tretë që votoj dhe më duket e pakuptimtë që ngrihet pretendimi se unë kam votuar pa qenë fare këtu. Hera e fundit që kam dalë jashtë vendit ka qenë viti 2013, më pas kam qendruar këtu vazhdimisht”.
Nga Aleks Kalemasi
