Ndërkohë që Rusisë po i largohen tenistët, Anastasia Gasanova, numri 154 në renditjen WTA, ka “ndezur” rrjetet sociale duke treguar përvojën e saj personale në Ukrainë, gjatë vitit 2014, kur stërvitej në Odessa.
“Nëse në Ukrainë ka “ndikime” të bombardimeve mbi civilët e pafajshëm, kjo është tragjedi, por nëse ndodh në Rusi kjo gjë, ne e meritojmë. Zoti nuk u ka dhënë tru disa njerëzve, për fat të keq. Pse janë kaq të lumtur? Nëse duan të rimarrin Krimenë, nuk ndërtohet duke shkatërruar. Kam heshtur për një kohë të gjatë dhe jam lodhur duke heshtur. Tani do të tregoj historinë time në vitin 2014”, nis rrëfimi në Instagram i tenistes ruse.
Gasanova thotë se “u detyrua të largohej” nga Ukraina dhe se “Forcat e Armatosura të Ukrainës vranë njerëz vetëm sepse flisnin rusisht”.
“Pas 2 majit 2014 ishte e pamundur të vishje fanellën e kombëtares ruse, sepse ata mund të të qëllonin pa hezitim. A është i qartë pozicioni im? Faleminderit për vëmendjen tuaj. Natën e mirë të gjithëve”, mbyll tenistja ruse.
