E Ngarkuara me Punë në ambasadën e Shteteve të Bashkuara të Amerikës në Tiranë, Nancy VanHorn u takua sot me kryetarin në detyrë të Gjykatës së Posaçme të Shkallës së Parë kundër Korrupsionit dhe Krimit të Organizuar, Erjon Bani. Ky takim vjen pas sulmeve që Berisha, Meta dhe eksponentë të tjerë po ushtrojnë ndaj GJKKO.
Në këtë takim u riafirmua angazhimi i SHBA në mbështetje të luftës së Shqipërisë kundër korrupsionit dhe krimit të organizuar.
“E ngarkuara me punë Nancy VanHorn u takua me ushtruesin e detyrës së Kryetarit të Gjykatës së Shkallës së Parë Kundër Korrupsionit dhe Krimit të Organizuar Erjon Bani për të riafirmuar angazhimin e SHBA për të mbështetur luftën e Shqipërisë kundër korrupsionit dhe krimit të organizuar. Ata diskutuan rolin kritik të gjykatës në sigurimin e drejtësisë, dhënien fund të mosndëshkimit dhe forcimin e besimit publik, si dhe mundësitë për bashkëpunim të vazhdueshëm për të mbështetur drejtësinë, pavarësinë dhe integritetin në vendimet gjyqësore”, thuhet në postimin në “X” të Ambasadës së SHBA në Tiranë.
Pak ditë më parë Nancy VanHorn u takua edhe me kryetaren e Apelit të Posaçëm, Saida Dollani, duke i dhënë mbështetje në luftën ndaj korrupsionit.
“E Ngarkuara me Punë Nancy VanHorn u takua me kryetaren në detyrë të Gjykatës së Posaçme të Apelit kundër Korrupsionit dhe Krimit të Organizuar, gjyqtaren Saida Dollani. Znj. VanHorn ndau mbështetjen e palëkundur për gjyqtaren Dollani dhe kolegët e saj, të cilët shfaqin guxim të pamasë dhe sakrificë personale në luftën kundër korrupsionit dhe krimit të organizuar. Vendimet e tyre janë jetike për t’i dhënë fund kulturës së mosndëshkimit në Shqipëri. Ambasada e SHBA mbetet e përkushtuar për të mbështetur institucionet e drejtësisë së Shqipërisë në misionin e tyre për të ruajtur drejtësinë dhe integritetin”, njofton ambasada.
Këto takime vijnë pas disa mesazheve që kanë ardhur javët e fundit nga amerikanët. Vetë sekretari Antony Blinken ishte ai që dekori Altin Dumanin dhe u shpreh prerë se SHBA do ta godasë korrupsionin me të gjitha mënyrat. Po ashtu vetë de dërguara e SHBA, pak ditë më parë dha një mesazh të fortë në këtë aspekt.
