Vetoja greke pengoi politikisht Shqipërinë të marrë një lajm të mirë për negociatat e anëtarësimit, por të paktën BE-ja ka menduar për ekonominë t’i japë një tjetër dorë ekonomisë sonë dhe rajonit në tërësi. Ministri i Financave dhe Ekonomisë, Ervin Mete konfirmoi se Shqipëria po bisedon me Bashkimin Europian për të përfituar rreth 1 miliard euro nga i ashtuquajturi “Plani i Rritjes së Ballkanit Perëndimor.”
“Po diskutohet me BE-në Plani i Rritjes, të cilin do ta kemi mundësi ta prekim edhe sot në ndërlidhjen e vet me Programin e Reformave Ekonomike që do të diskutojmë. Sigurisht që diskutimi me këtë Këshill, por edhe më gjerë me komunitetin e biznesit, është i rëndësishëm për të pasur një qëndrueshmëri të këtij momenti pozitiv”, u shpreh ministri i Financave dhe Ekonomisë, Ervin Mete.
Në një kohë që sipërmarrjet eksportuese po përballen me humbje si pasojë e zhvlerësimit të euros, ministri Mete kërkoi përshpejtim të procedurave për rimbursimin e Tatimit mbi Vlerën e Shtuar të bizneseve.
“Dua të ndaj me ju që i kam kërkuar Administratës Tatimore që të gjitha rimbursimet që ka në proces të përmbyllen deri në fund të vitit, në mënyrë që të mos ketë asnjë rimbursim të mbartuar për vitin tjetër sepse edhe ky është një tregues i përmbushjes në kohë të detyrimeve në ndërveprimin me biznesin. Madje, i kemi kërkuar të përshpejtojë për sektorë të caktuar, siç janë eksportuesit apo sektorë të tjerë, procedurat e administrimit të mos ketë asnjë vonesë dhe vitin tjetër”, tha Mete.
Nga mbledhja e Këshillit të Investimeve, Mete njoftoi se Shqipëria është në prag të përmbylljes së diskutimeve me Fondin Monetar Ndërkombëtar për të hartuar një Strategji Afatmesme të Menaxhimit të të Ardhurave.
A2News /a.r
