Presidenti i Zvicrës, Guy Parmelin, paralajmëroi se rendi ndërkombëtar i krijuar pas Luftës së Dytë Botërore po përballet me sfida të mëdha, për shkak të shtimit të konflikteve, tensioneve gjeopolitike dhe dobësimit të besimit te institucionet shumëpalëshe.
Duke folur në Asamblenë e Përgjithshme të Kombeve të Bashkuara në Nju Jork, Parmelin tha se konfliktet po shtohen dhe po zgjaten, ndërsa parimet themelore të Kartës së OKB-së, përfshirë ndalimin e përdorimit të forcës dhe respektimin e sovranitetit e integritetit territorial, po shkelen hapur.
Një pjesë të fjalimit të tij, presidenti zviceran ia kushtoi edhe inteligjencës artificiale. Ai theksoi potencialin e saj në fusha si shkenca, ekonomia, mjekësia dhe arsimi, por paralajmëroi se zhvillimi i saj mund të krijojë një hendek të ri mes vendeve dhe shoqërive që kanë aftësitë e infrastrukturën për të përfituar nga teknologjia dhe atyre që mbeten kryesisht përballë pasojave të saj.
“Ne duhet të sigurohemi që progresi teknologjik të zgjerojë mundësitë pa zgjeruar boshllëqet”, deklaroi Parmelin, duke nënvizuar nevojën që të gjitha vendet të kenë mundësi të përfitojnë nga përparimet në inteligjencën artificiale dhe të marrin pjesë në hartimin e rregullave për zhvillimin dhe përdorimin e saj.
Në të njëjtën kohë, ai paralajmëroi se rregullimi i tepruar mund të kufizojë inovacionin dhe t’i privojë shoqëritë nga potenciali i teknologjive të reja. Sipas tij, sfida qëndron në gjetjen e një ekuilibri mes nxitjes së progresit dhe garantimit të një zhvillimi e përdorimi të besueshëm dhe të përgjegjshëm të teknologjisë.
