Presidenti polak Andrzej Duda ra pre e mashtrimit të dy aktorëve rusë të humorit, një prej të cilëve u paraqit si presidenti i Francës Emmanuel Macron, natën që një raketë ra në një fshat afër kufirit me Ukrainën. Zyra e presidentit Duda konfirmoi telefonatën me dy aktorët rusë të cilët më pas postuan një regjistrim.
Gjatë telefonatës, Duda tha se po tregohej “shumë i kujdesshëm” dhe se dëshiron të shmangë luftën me Rusinë. Ai ra pre e mashtrimit menjëherë pasi raketa vrau dy vetë në një fermë.
Sulmi i 15 Nëntorit ndodhi gjatë breshërisë më të madhe të raketave ruse mbi Ukrainë që nga fillimi i luftës. Polonia tha se sulmi nuk ishte i qëllimshëm.
Një javë pas sulmit, dy aktorët Vovan dhe Lexus morën përsipër autorësinë e telefonatës me presidentin polak.
“Gjatë telefonatës, presidenti Andrzej Duda kuptoi nga mënyra e pazakontë se si bashkëbiseduesi e zhvilloi bisedën se mund të kishte pasur një tentativë mashtrimi dhe i dha fund bisedës”, thuhet në njoftimin e zyrës së Dudës, duke shtuar se po tani kryhet një hetim për mënyrën sesi telefonuesit arritën deri te presidenti.
Kjo është hera e dytë që presidenti Duda vihet në shënjestër të shakave të tilla.
/a.r
