Në një tryezë të përbashkët me akademikë dhe profesorë, Presidenti i Republikës Bujar Nishani ka dëgjuar nga afër ankesat dhe shqetësimet e tyre për ligjin e Arsimit të Lartë, i cili u votua me 78 vota pro në Parlament javën e shkuar.
Nishani ka mbledhur ajkën e shoqërisë shqiptare në këtë takim konsultativ pak ditë para se ai të vendosë për ta firmosur ose jo atë.
Nishani është shprehur i vetëdijshëm se, ligji i ri për arsimin e lartë ka pasur sensibilitet tek pedagogët dhe studentët.
“E drejta për t’u arsimuar dhe autonomia e universiteteve janë të drejta themelore. Është tagri im që të garantoj liritë dhe të drejtat bazë, ku ajo për arsim është më e rëndësishmja në një shoqëri, – ka thënë Nishani. – Një ligji që përfshin këto dy shtylla duhet hartuar patjetër në bashkëpunim me pedagogë e studentë. Ligji është i rëndësishëm për akademikët. Ai ka ngjallur debate të shumta, ka pasur ankesa. Unë jam interpretues i parë i Kushtetutës dhe do të jem jashtë debatit politik. Kërkoj mendimin tuaj për ligjin”, – u ka thënë Nishani profesorëve dhe akademikëve.
Shoqata të ndryshme studentore dhe një pjesë e shoqërisë civile, kanë kundërshtuar ligjin në fjalë.
