Duket se kreu i shtetit e ka bërë “adet” që sa herë do të përfshihet në politikë kundër kundërsharëve të tij politik, dhe për të na kujtuar pozicionin e tij pro PD, thërret një grup nga “shoqëria civile” dhe njofton nismat e tij kundër Bashkisë së Tiranës, konkretisht kundër kryetarit të saj, Erion Veliaj. Gjatë një takimi të Presidentit Bujar Nishani me një grup aktivistësh civilë, për mjedisin ai i ka informuar të pranishmit se ka kërkuar në mënyrë institucionale “një hetim të pavarur e të paanshëm ndërkombëtar të ndërtimit në parkun e Liqenit artificial të Tiranës, në respekt dhe zbatim të Konventës së Aarhusit, nënshkruese e së cilës është edhe vendi ynë”.
Kërkesa për hetim ndërkombëtar për “Parkun”, në realitet shpreh mosbesim të hapur nga kreu i shtetit ndaj Prokurorit të Përgjithshëm, Adriatik Llalla. Duket se pasi Llalla nuk arriti t’i “provojë” deklaratat e tij për “përgjimin”, duke e nxjerrë bllof kreun e shtetit, ky i fundit ka vendosur të mos ia falë. Dhe këtë duke deklaruar hapur se do të kërkojë hetim ndërkombëtar për Veliajn në lidhje me Parkun, ndonëse e kishte thirrur Llallën 3 javë më parë duke ia kërkuar atij fillimisht këtë hetim. Duket se në këto momente ka një konfuzitet tek kreu i shtetit, i cili është qytetari i parë që shpreh hapur se nuk ka besim tek Kryeprokurori, të cilin e ka dekretuar vetë.
Gjatë këtij takimi, siç bën me dije dhe zyrate shtypit të Presidentit, aktivistët kanë vënë në dukje se, “duke pasur parasysh zhvillimet e kohëve të fundit, tashmë është krijuar një përballje ku Presidenti dhe qytetarët janë dhe qëndrojnë fort në anën e kushtetueshmërisë në mbrojtje të thelbit të shtetit të së drejtës, të përfaqësimit sa më të ligjshëm e të moralshëm të interesave të popullit dhe të garantimit të të gjitha të drejtave të tyre”.
(javanews.al) Me. Ar
