“Ne nuk do të paguajmë”! Presidenti meksikan Enrique Pena Nieto reagoi sërish mbi deklaratën e presidentit të zgjedhur amerikan Donald Trump i cili konfirmoi planin për ndërtimin e një muri në kufirin me Meksikën, për të cilin deklaroi se ky shtet duhet të paguajë.
“Është e qartë se ne kemi disa dallime me qeverinë e ardhshme të Shteteve të Bashkuara të Amerikës, si çështja e ndërtimit të një muri, të cilin natyrisht, Meksika nuk do të paguajë”, tha Pena Nieto.
Kjo deklaratë e tij erdhi pasi presidenti i zgjedhur Donald Trump në një konferencë të mëparshme për shtyp këmbënguli që Meksika do të paguajë për një pengesë të tillë me anë të rimbursimeve ose taksave.
Pena Nieto u shpreh se “të gjitha temat të cilat përcaktojnë marrëdhëniet tona dypalëshe janë në tryezë. Në asnjë kohë ne nuk do të pranojmë asgjë që shkon kundër dinjitetit tonë si shtet dhe si meksikanë”./a.m.
