Presidenti kinez Xi Jinping u bëri thirrje të martën Kinës dhe Britanisë ta respektojnë e besojnë njëra-tjetrën, të kapërcejnë mosmarrëveshjet e të kërkojnë bazën e përbashkët, duke zgjeruar bashkëpunimin me përfitime të ndërsjella.
Xi i tha këto gjatë një bisede në telefon me kryeministrin britanik Andy Burnham.
Duke e uruar Burnhamin për marrjen e detyrës së kryeministrit britanik, kreu i shtetit kinez theksoi që Kina dhe Britania janë partnere të gjithanshme strategjike.
Pavarësisht ndryshimeve në sistemet shoqërore dhe në kushtet kombëtare të tyre, të dy vendet kanë më shumë interesa të përbashkëta sesa dallime, tha presidenti Xi.
Ai vuri në dukje më tej që të dyja qeveritë janë të përkushtuara për zhvillimin e ekonomisë e për përmirësimin e jetesës së njerëzve, dhe të dyja palët mund të përplotësojnë pikat e forta të njëra-tjetrës e ta ndihmojnë njëra-tjetrën.
Duke theksuar se Kina dhe Britania janë dy fuqi tekniko-shkencore, me burime të pasura arsimore, kulturore, sportive e në fusha të tjera, presidenti Xi Jinping u bëri thirrje të dyja palëve të mbajnë qëndrim të hapur e largpamës dhe të forcojnë shkëmbimet e bashkëpunimin në fusha të ndryshme.
Xi shprehu shpresën që pala britanike do të mbrojë plotësisht të drejtat dhe interesat e ligjshme të investitorëve kinezë.
Nga ana e tij, kryeministri Burnham u shpreh në një mendje me presidentin Xi dhe përmendi lidhjen e vet me Kinën kur ishte kryetar bashkie i Mançesterit të Madh.
Duke kujtuar vajtjen e Xi Jinping-ut në këtë qytet gjatë vizitës së tij shtetërore në Britani në vitin 2015, Burnham tha se kjo vizitë pati një ndikim të madh në marrëdhëniet mes Mançesterit dhe Kinës.
Ai theksoi që Britania do të mbetet e vendosur në politikën e vet ndaj Kinës, si edhe në krijimin e partneritetit strategjik afatgjatë dhe të qëndrueshëm me palën kineze.
Britania është e gatshme të zhvillojë shkëmbimet e nivelit të lartë me Kinën, të çojë përpara bashkëpunimin dypalësh në fusha të ndryshme dhe të forcojë shkëmbimet njerëzore midis të dy vendeve, për t’i ngritur marrëdhëniet Britani-Kinë në një nivel të lartë si kurrë më parë për të mirën e dy popujve, tha Andy Burnham.
Qëndrimi i Britanisë për çështjen e Tajvanit është i pandryshuar, vuri në dukje ai.
Burnham e vlerësoi Kinën për reagimin shembullor ndaj rrëshqitjes së dheut në kufirin e saj me Nepalin dhe e falënderoi palën kineze për ndihmën e dhënë ndaj shtetasve britanikë të prekur nga fatkeqësia.
