Presidenti i Torinos i kërkon falje De Biasit: Gabova me të
Presidenti i Torinos, Urbano Cairo, në një intervistë për të përditshmen Tuttosport, ka folur për 10 vitet e tij në krye të njërit nga klubet më me histori në Itali.
Gjatë intervistës së gjatë, Cairo ndalet gjatë edhe në kohën kur trajneri i kombëtares shqiptar, Gianni De Biasi, ishte trajner i Torinos. Pa lojëra fjalësh, Cairo e pranon se gaboi rëndë me largimin e De Biasit, duke i kërkuar falje për veprimin e tij.
“Unë jam një njeri i ndershëm. Si botues kam hedhur në treg tre revista të cilat janë ndër më të shiturat në treg. Si president i Torinos kur sapo kisha mbushur 9 muaj e 9 ditë arrita ta ngjisja skuadrën në Serie A. Në atë kohë mendoja se kisha aftësi të jashtëzakonshme që nuk me lejonin të falimentoja në vendimet e mija. Mendoja se isha mbreti Mida dhe nisa të bëja gjëra të pamenduara si psh. shkarkimin e trajnerit De Biasi përpara se kampionati të fillonte. De Biasin e riktheva, e largova dhe e rimora sërish prandaj përfitoj nga kjo intervistë për t’i kërkuar falje. Mendoja se kuptoja gjithçka nga futbolli por kisha dalë nga kontrolli sepse futbolli është një fushë shumë e vështirë”, tha Cairo për Tuttosport.
