Presidenti i Maqedonisë së Veriut, Stevo Pendarovski tha në emisionin “Përballë” të gazetarit Lutfi Dervishi se nuk e priste vendimin negative të Këshillit Europian për hapjen e negociatave me Maqedoninë e Veriut dhe Shqipërinë.
Megjithatë, sipas tij, integrimi europian është e vetmja alternativë që duhet të ndjekë Ballkani Perëndimor.
“Ata folën për fqinjë, për fqinjësinë. Fqinjë të Bashkimit Europian janë vendet në të ashtuquajturin Partneritet Lindor, vendet e Azisë Qëndrore, Moldavia dhe vendet e pjesës veriore të Afrikës.
Ne nuk jemi fqinjë. Ne jemi pjesë e kontinentit europian dhe sipas dokumentave bazë të BE-së nga 1957, kemi të drejtën e plotë për të qenë një ditë pjesë e Europës institucionale”, u shpreh Pendarovski në RTSH.
Pendarovski: Kujdes me Mini-Shengenin Ballkanik!
Presidenti i Maqedonisë së Veriut, Stevo Pendarovski ka shprehur rezerva sa i përket idesë së Mini-Shengenit Ballkanik. Pendarovski tha në emisionin “Përballë” të gazetarit Lutfi Dervishi se një alternativë mund të jetë rigjallërimi i marrëveshjes CEFTA mes vendeve të Ballkanit Perëndimor.
“Nëse Shengeni apo Mini-Shengeni, sido që ta quajmë, do të na ofrohet nga Brukseli si një lloj kompensimi në këmbim të anëtarësisë së plotë në BE, do të isha kundër kësaj ideje. Sepse e kam dëgjuar diçka të tillë nga disa cepa të shoqërisë europiane se EEA (zona europiane ekonomike) plus mini-shengeni mund të jenë një zëvendësues për anëtarësimin në BE. Duke patur parasysh këtë kontekst nga vendimi i fundit i Këshillit Europian-së do të isha shumë i kujdesshëm për këtë çështje”, – u shpreh Pendarovski në RTSH.
Marrëdhënia Kosovë-Serbi, Pendarovski: Nuk ka zgjidhje pa ndërhyrjen e SHBA-ve!
Pendarovski thotë se një opsioni i zgjidhjes se mosmarrëveshjeve mes Kosovës e Serbisë përmes shkëmbimit të territoreve është një precedent i rrezikshëm për Ballkanin.
“Nuk është gjë e mirë që të mbyllësh një problem, problemin e Kosovës dhe të hapësh dy apo tri probleme të tjera në rajon”, – tha Pendarovski në RTSH.
Presidenti i Maqedonisë së Veriut u shpreh në emisionin Përballë të gazetarit Lutfi Dervishi se pa ndërhyrjen e SHBA-ve vështirë se kjo çështje mund të gjej zgjidhje.
“Pa një përfshirje serioze të SHBA-së nuk është e mundur që BE e vetme të zgjidhë krizat dhe problemet e kësaj natyre. Ne patëm një krizë tonën në vitin 2001, patëm konflikt në territorin tonë dhe pas kësaj nënshkruam marrëveshjen kornizë të Ohrit dhe atëherë ndërmjetësuesi i BE-së punonte ngushtësisht me ndërmjetësin amerikan. Unë nuk mendoj që pa një përfshirje aktive nga Uashingtoni, do të shohim një zgjidhje të qëndrueshme të këtij procesi”, – tha Pendarovski në RTSH.
Pendarovski: Nuk është bërë asgjë për Korridorin 8!
Pendarovski tha se në 25 vite nuk është bërë asgjë për të realizuar projektin e Korridorit 8-të, sipas Memorandumit të nënshkruar nga presidentët e 4 vendeve. Për këtë Presidenti I Maqedonisë së Veriut fajson lidershipin politik.
“Për shkak të udhëheqjes politike në të dy vendet. Nuk po flas vetëm për udhëheqjen politike të sotme. Po flas për lidershipin politik gjatë 20 viteve të fundit. Nuk kemi asnjë justifikim për këtë,”- tha Pendarovski në RTSH.
