Presidenti në largim i Kolumbisë, Gustavo Petro, i cili do të qëndrojë në detyrë deri më 6 gusht, thotë se arritja më e madhe e mandatit të tij katërvjeçar është ulja e varfërisë.
Në një intervistë për Corriere della Sera, ai deklaroi se rreth 7 milionë qytetarë kanë dalë nga varfëria, duke e cilësuar këtë si trashëgiminë më të rëndësishme të qeverisjes së tij.
Duke komentuar humbjen e zgjedhjeve presidenciale, Petro akuzoi aktorë të jashtëm se kanë ndikuar në rezultatin elektoral përmes përdorimit të inteligjencës artificiale. Ai përmendi emra si Benjamin Netanyahu, Donald Trump, ish-presidentin e Hondurasit Juan Orlando Hernández dhe presidentin argjentinas Javier Milei, duke pretenduar se janë investuar dhjetëra milionë dollarë në fushata dezinformuese. Sipas tij, inteligjenca artificiale e bën gjithnjë e më të vështirë dallimin mes së vërtetës dhe gënjeshtrës.
Lidhur me deklaratat e presidentit të zgjedhur Abelardo de la Espriella, i cili ka paralajmëruar ndërprerjen e negociatave me grupet e armatosura dhe një qasje më të ashpër ndaj tyre, Petro tha se guerrilja, në kuptimin klasik, nuk ekziston më. Ai kujtoi se edhe vetë ka qenë pjesë e një lëvizjeje guerrile, por sipas tij, pas marrëveshjes së paqes me FARC-in, periudha e kryengritjes kundër shtetit ka përfunduar.
Sipas Petros, problemi kryesor sot nuk është guerrilja, por ndikimi i narkotrafikut në institucionet shtetërore dhe në zonat rurale të Kolumbisë. Ai tha se gjatë qeverisjes së tij vendi nuk është më eksportuesi kryesor i kokainës dhe se strategjia e ndjekur ka qenë mbështetja e fermerëve të kokës për të kaluar në kultura të tjera bujqësore, në vend të shkatërrimit të tokave apo bombardimeve.
Duke folur për rritjen e forcave të djathta në Amerikën Latine, Petro tha se ky fenomen vjen nga jashtë rajonit. Ai shtoi se nuk preferon më termat “e djathtë” dhe “e majtë”, duke i konsideruar të vjetëruara, por përdor përkatësisht shprehjet “mendësi të burgosura në fashizmin evropian” dhe “progresizëm”.
Sa i përket rolit të Kinës në Amerikën Latine, Petro kujtoi se Kolumbia ka nënshkruar marrëveshjen për nismën “Rruga e Mëndafshit”. Megjithatë, ai theksoi se kontinenti nuk duhet të bëhet i varur as nga Shtetet e Bashkuara, as nga Evropa dhe as nga Kina, por duhet të ruajë pavarësinë dhe interesat e veta.
Petro paralajmëroi gjithashtu se ekziston mundësia që Amerika Latine të bjerë nën ndikimin e Shteteve të Bashkuara. Duke iu referuar Donald Trumpit, ai tha se e ka quajtur atë “mbret”, duke shtuar se kjo kujton kohën kur Kolumbia luftonte për t’u çliruar nga sundimi kolonial dhe për të mbetur republikë.
Në fund të intervistës, Petro kujtoi të kaluarën e tij si pjesëtar i guerriljes, kur përdorte pseudonimin “Aureliano”, frymëzuar nga personazhi i romanit “Njëqind vjet vetmi” të Gabriel García Márquez.
Ai tregoi se kishte studiuar në të njëjtën shkollë me shkrimtarin kolumbian dhe se pikërisht aty u formësua si revolucionar, duke kujtuar se dikur drejtuesit e shkollës ndalonin leximin e veprave të Márquez-it dhe fshihnin faktin se ai kishte qenë nxënës i saj.
