Presidenti i Republikës Bujar Nishani organizoi një pritje me rastin e Pavarësisë së Shqipërisë. Në pritjen e mbajtur në Pallatin e Brigadave ai mbajti një fjalim ku theksoi se sfida kryesore mbetet integrimi i vendit. Por Nishani gjatë fjalës së mbajtur, përmendi ato që janë kthyer në betejat e opozitës, luftën antikanabis dhe zgjedhjet e lira.
“Hapja sa më parë e negociatave të anëtarësimit do të jetë hapi tjetër cilësor. Ajo që mbetet pjesa thelbësore e këtij procesi është angazhimi dhe përkushtimi në përmbushje të standardeve të kërkuara. Periudha në vijim është një periudhë me dy prioritete; zgjedhjet e lira dhe lirimi i vendit nga kanabisi, kjo murtajë që rrezikon të sotmen dhe të nesërme, ne dhe fëmijët tanë, demokracinë dhe integrimin. I ftoj të gjitha palët politike që sa më shpejt të bëjnë reformën zgjedhore. Vendi e ka të pamundur të ballafaqohet me zgjedhje të cënuara dhe kontestuara. Shpreh besimin se Shqipëria dhe institucionet do të dinë të ngrihen në lartësinë e sfidave të bashkëkohësisë. Gëzuar festën e Pavarësisë. Rroftë flamuri kuqezi, Zoti i bekoftë shqiptarët dhe Shqipërinë. Gëzuar”, u shpreh Presidenti i Republikës Bujar Nishani. /a.m.
