Presidenti filipinas, Rodrigo Duterte vijon deklaratat e tij jo vetëm provokuese por tronditëse. Ai e ka krahasuar fushatën e tij të përgjakshme kundër drogës me vrasjet e Hitlerit.
Fushata e tij kundër trafikantëve të drogës ka shkaktuar deri tani mbi 3 mijë të vrarë. Duterte është shprehur se do të ishte i gatshëm të masakronte 3 milionë të varur nga droga.
Kërcënimi i tij i fundit ndaj personave që kanë varësi nga droga dhe shpërndarësve u bë gjatë vizitës së tij në qytetin filipinas Davao, pas një vizite që ai kishte në Vietnam, ku ka diskutuar për këtë fushatë me liderët vendas.
“Hitleri masakroi 3 milionë hebrenj. Kemi 3 milionë të varur nga drogë. Do të kënaqesha duke i ekzekutuar”, ka thënë ai. Duterte ka deklaruar se do të shpëtojë Filipinet për brezin e ardhshëm.
Në fakt, Duterte duket se nuk e njeh mirë historinë e nazizmit në Europë. Gjatë Luftës së Dytë Botërore, nazistët vranë 6 milionë hebrenj.
BW/d.i.
