Kreu i LSI-së Ilir Meta, duke folur në fund të seancës së raundit të parë për zgjedhjen e presidentit, e cila dështoi për shkak se nuk kishte asnjë kandidat, u shpreh se po pritet opozita për të bashkëpunuar për të zgjidhur Kreun e Shtetit.
Po ashtu, Meta ka bërë me dije se raundi i dytë për zgjedhjen e presidentit do të mbahet ditën e nesërme, ndërsa bëri thirrje edhe një herë për dialog mes opozitës dhe mazhorancës.
“Ezaurimi i raundit të sotëm pa kandidat ishte durim i vullneti për të pasur mundësi për të biseduar me opozitën. Pasi dihet që kjo mazhorancë i ka numrat për të zgjedhur Presidentit, por besojmë se ky është një proces që kërkon edhe bashkëpunimi e PD-së. Raundi do të jetë nesër, në seancë më vete përveç seancës së zakonshme. Ishte një kërkesë e grupit parlamentar të shumicës. Ne do ta presim PD brenda gjithë mundësive, po nuk mjafton vetëm ne ta presim por duhet edhe opozita të vijë.”, -tha Meta.
Ai foli edhe në lidhje me çështjen e bojkotit nga opozita. I pyetur nëse LSI do të futet apo jo në zgjedhje, Meta dha këtë përgjigje:
“Për zgjedhje pa opozitën, unë kam qenë gjithmonë i prirur të kuptoj shqetësimet e tyre, që nuk kanë qenë vetëm të tyre por edhe të tonat për çështjen e drogës dhe të dekriminalizimi, kjo jo për ti dhënë të drejtë opozitës. Në jemi për forcimin e shteti ligjor dhe për të çuar përpara reformën në drejtësi.
E mirëkuptoj shqetësimin tyre dhe ndërkohë që pres përpjekje për dialog me ndërmjetësin e PPE.
Nuk përkrahim kalimin e krizës në ekstrem. Do marr në konsideratë seriozit ato cka do të rekomandojnë PPE”, tha Meta./a.m.
