Edhe pse zgjedhjet presidenciale amerikane të vitit 2028 duken larg, prapaskenat politike në Uashington kanë nisur të trazohen. Emra të njohur nga të dyja kampet – si ai i Sekretarit të Mbrojtjes, Pete Hegseth, dhe i kongresmenes progresiste, Alexandria Ocasio-Cortez (AOC) – po përfliten gjithnjë e më shumë si kandidatë potencialë, megjithëse përballen me sfida dhe reagime të ndryshme publike.
Sipas raportimeve nga agjencia ANSA, duke cituar burime të NBC News, ish-prezantuesi i Fox News dhe aktualisht kreu i Pentagonit, Pete Hegseth, ka diskutuar mundësinë e një kandidimi me rrethin e tij të ngushtë. Prania e tij e fundit në Panairin Shtetëror të Ajovës – tradicionalisht pika e nisjes për fushatat presidenciale – ngriti menjëherë spekulime rreth ambicieve të tij politike.
Megjithatë, Hegseth i ka hedhur poshtë me forcë këto zëra. Përmes një reagimi në rrjetin social X, ai e cilësoi lajmin si “100% të rremë”, duke theksuar se fokusi i tij i vetëm mbetet drejtimi i departamentit.
Të njëjtën linjë mbajti edhe zëdhënësi i Pentagonit, Sean Parnell, i cili këmbënguli se spekulimet janë të pabazuara. Pavarësisht se strategët republikanë shohin te Hegseth elemente të popullaritetit të lëvizjes MAGA, sondazhet e fundit e nxjerrin atë prapa figurave si Zëvendëspresidenti J.D. Vance apo Sekretari i Shtetit Marco Rubio.
Në kampin demokrat, lëvizjet duken më konkrete. Sipas Axios, Alexandria Ocasio-Cortez ka nisur një riorganizim të thellë të stafit të saj. Menaxheri i saj i hershëm i fushatës, Oliver Hidalgo-Wohlleben, pritet të largohet në shtator, ndërsa rolin e tij e ka marrë përkohësisht ndihmësja Fiorella Bini.
AOC mbetet një nga figurat më ndikuese mes votuesve të rinj dhe krahut progresist, por daljet e saj të fundit publike nuk kanë kaluar pa kritika. Pas një fjalimi të mbajtur në Uashington për përvjetorin e fjalimit historik të Martin Luther King, ajo u përball me reagime negative në mediat sociale, ku llogari të lidhura me opozitën e akuzuan për përdorimin e një “theksi të rremë” për të fituar mbështetjen e komunitetit afrikano-amerikan.
