Presidenca ka reaguar përmes një njoftimi zyrtar pas përfundimit të takimit 3-orësh mes Ramës dhe Bashës, me ndërmjetësimin e kreut të shtetit Bujar Nishani.
Në njoftimin e shpërndarë, presidenca lë të kuptohet se nuk është gjetur një zgjidhje, por thekson se presidenti vijon të mbajë kontakt me palët për arritjen e kompromisit.
Sipas presidencës, palët shkëmbyen pikëpamjet për daljen nga kjo situatë.
Njoftimi:
Me ftesë të Presidentit të Republikës, Bujar Nishani sot u zhvillua një takim midis Kryeministrit të vendit Edi Rama dhe Liderit të opozitës Lulzim Basha.
Gjatë takimit palët prezantuan pikëpamjet e tyre mbi krizën politike dhe rrugët e zgjidhjes së saj.
Presidenti i Republikës vijon të mbajë kontaktet me palët për gjetjen e një zgjidhjeje të mundshme mbi bazë kompromisi.
