Agon Ajeti, një i ri nga Presheva, është përballur përditë me njerëz që kanë ardhur nga larg në lagjen e tij. Refugjatë që shtohen përditë, për fatin e të cilëve nuk pyet askush. Ai, së bashku me disa miq të tij, u kanë ofruar shtëpitë e tyre që kanë qenë të pabanueshme, ndërsa lagjet shqiptare të Luginës së Preshevës kanë strehuar dhe strehojnë edhe familje në gjendje të rëndë.
“Tre shtëpi që ishin të pabanueshme, i kthyem në të banueshme me disa ndërhyrje të vogla. Ka pasur edhe 200 persona që kanë kaluar natën në këto 3 shtëpi”, thotë Ajeti.
Përvec tij, banorët kanë ofruar ndihmë, ushqime e përkujdes mjekësor. Para disa javëve një grua lindi në këtë zonë.
Mijëra refugjatë kanë arritur nga Siria. Për shkak të presionit, edhe nga Hungaria. Policët e këtij shteti, bashkë me ata austriakë e serbë, kanë filluar patrullimet e tyre në zonën kufitare me Maqedoninë. Dragan Llazareviç, nga Policia e Serbisë, shprehet: “Kemi parandaluar kalimin illegal të rreth 800 personave për një ditë, ndërsa mund të themi që për një fundjavë numri është mbi 1900 persona”.
Ministra të ndryshëm vizitojnë këtë zonë. Qeveria e Serbisë ka filluar ndërtimin bashkë me ndihmat lokale të një strehimoreje të përkohshme, ku ata mund të pushojnë. Fluksi i madh ka bërë që mbi 30 mijë refugjatë të hyjnë në rrugën e Evropës.
“Edhe ne kemi kaluar një situatë të tillë në kohën e luftës, për këtë arsye jemi solidarizuar”, thotë Agoni.
Megjithatë, në Ballkan, njerëzit si Agon Ajeti dhe miqt e tij, duken të pakët që lidhin emigrantët me në rrugën e katrahurës me pak mirësjellje që për këta njerëz është kujtesë dhe shpresë në rrëfime zinxhirore të tragjedive./ Top Channel
