Reshjet e dëborës janë ndërprerë, por temperaturat kanë qenë tepër të ulëta në të gjithë vendin gjë që ka vështirësuar jetesën e banorëve në zonat më të prekura nga moti i ftohtë, dhe sidomos qarkullimin rrugor në zonat rurale.
Ka ende akse rrugore nëpër fshatra të njësive administrative në zona të thella malore, të cilat nuk ka qenë e mundur të hapen plotësisht.
Drejtori i Përgjithshëm i Emergjencave Civile, Shemsi Prençi deklaron se rrugët nacionale janë të hapura dhe se kompanitë janë të angazhuara për situatën.
Duke folur për situatën e vështirë që po kalon vendi për shkak të motit të keq, në një lidhje telefonike për mediat, Prençi i bëri thirrje të gjithë drejtuesve se pavarësisht se rrugët janë të hapura, në disa segmente është i domosdoshëm përdorimi i zinxhirëve.
Kreu i Emergjencave Civile siguroi se ekipet e emergjencave civile do të jenë në gatishmëri të plotë për t’i ardhur në ndihmë çdo familjeje që paraqet probleme.
“Punonjësit e emergjencave, firmat kontraktore, Policia e Shtetit dhe të gjitha strukturat e angazhuara për përballimin e situatës gjenden në terren, për t’iu gjendur pranë qytetarëve e mjeteve në vështirësi”, tha ai.
Ndërkohë furnizimi me energji elektrike ka qenë gjithashtu me ndërprerje në zonat e thella, sepse për shkak të ngricave, specialistët e OSHEE e kanë të vështirë lëvizjen me mjete.
Punonjësit e emergjencave, Policia e Shtetit dhe gjithë strukturat e angazhuara për përballimin e situatës, gjenden në terren për t’iu gjendur pranë qytetarëve e mjeteve në vështirësi.
Parashikimet sinoptike njoftojnë për një përmirësim të temperaturave në ditët e ardhshme, por që gjithsesi do të jenë nën zero ndërsa në zonat e ftohta malore, do të vijojnë temperaturat tepër të ulëta.
