Pasi zbriti në fund të javës së kaluar në 136.8 lekë, niveli më i ulët në pesë vjet, monedha e përbashkët e ka marrë veten gjatë kësaj jave në tregun e brendshëm.
Sipas kursit zyrtar të këmbimit të Bankës së Shqipërisë, euro është rritur sot, për të tretën ditë radhazi, për të arritur në 137.6 lekë. Megjithatë, ai vazhdon të mbetet larg mesatares prej rreth 140 lekë, ku është luhatur tre vitet e fundit.
Edhe dollari është forcuar sot në tregun e brendshëm, duke u ngjitur në 129.7 lekë.
Javën e kaluar, monedha e përbashkët shënoi një rënie të fortë disa ditore, që kulmoi të premten, duke zbritur nën nivelin e 137 lekëve. Sipas ekspertëve të tregut, kjo lëvizje ishte më së shumti spekulative, teksa kompanitë e mëdha janë në prag të shpërndarjes së dividendit dhe u duhet të grumbullojnë euro, që po tentojnë ta blejnë sa më lirë.
Në bursat ndërkombëtare, euro ra gjatë ditës së sotme me pothuajse gjysmë centi, duke u tregtuar me $1.0629 EUR=.
Forcimi i lekut gjatë muajit të fundit ka qenë pozitiv për të gjithë ata që kanë kredi në valutë dhe të ardhura në lekë, pasi u duhen më pak lekë për të paguar këstet e tyre mujore. Pozitive është dhe për importuesit nga vendet e BE-së, që mund të blejnë euron më lirë.
Ndikim negativ forcimi i lekut ka tek eksportuesit, që marrin më pak të ardhura në lekë, nga shitja e produkteve të tyre jashtë vendit./Monitor
