Prefektja e qarkut të Dibrës, Donika Hysenaj, do të jetë kandidatja e “Rilindjes” për zgjedhjet e jashtëzakonshme për kryetarin e Dibrës, shkruan sot gazeta Shekulli. Hysenaj ka reaguar ashpër ndaj skandalit seksual të kryebashkiakut Shukri Xhelili, duke u shprehur se distancohet nga kjo ngjarje e rëndë.
Kandidimi i një femre për Bashkinë e Dibrës duket si tentativa për të kërkuar ndjesë pas asaj që u denoncua me zë dhe figurë. Ndërkohë emri i kandidatit të djathtë për kreun e Bashkisë Dibër mendohet se do të jetë Ilir Krosi.
Zgjedhjet në Bashkinë e Dibrës mund të zhvillohen, sipas të gjitha afateve ligjore, në fund të muajit qershor, datë të cilën pritet ta dekretojë Presidenti i Republikës. Në rastin e ndërprerjes të mandatit të kryebashkiakut, Presidenti duhet të shpallë zgjedhjet 48 orë pas përfundimit të afatit të ankimimit, i cili është 15 ditë dhe fillon në momentin e zbardhjes së vendimit të qeverisë.
Shukri Xhelili, kryetar i Bashkisë Dibër, u shkarkua të premten, 13 maj, me vendim të Këshillit të Ministrave.
Pra në rast se bëjmë një llogari të thjeshtë, rreth datës 27 maj, Presidenti do të ketë 48 orë kohë të shpallë datën e zgjedhjeve. Në rast se do t’i japim një afat maksimal, fundi i qershorit mund të jetë edhe data kur do të zhvillohen zgjedhjet e jashtëzakonshme për kryetarin e Bashkisë së Dibrës.
Shukri Xhelili u shkarkua nga posti i kryetarit të Bashkisë së Dibrës, pas publikimit të video-skandalit ku ai shfaqej duke i kërkuar favore seksuale një vajze 20-vjeçare në këmbim të një vendi pune. a.k
