Analisti Preç Zogaj, duke marrë rastin e deputetes Jorida Tabaku si gruaja më e votuar në primaret e PD-së në Tiranë, por që u la në listë të hapur, deklaroi se asaj iu bë padrejtësi dhe se primare ishin absurde dhe një falsitet.
“Joridës i është bërë një padrejtësi. Këto janë primaret më absurde, një falsitet. Në Tiranë, primare vetëm për listën e hapur rezultoi se lista e mbyllur jo, me ndonjë përjashtim të vogël, janë të emëruar të cilëve nuk do t’ju numërohen as votat.
Kryetari i PD është kujdesur jo vetëm t’i emërojë, por edhe të mos votohen më. Është kujdesur të jenë rehat edhe në këtë pikë.
Kjo i zhvlerëson plotësisht primaret. Ato të zhvlerësuara ishin. Primare për dy javë nuk ka në botë. Është garë që bëhet me muaj. Këto ishin kot, por kësaj kotësie i shtohet nuliteti i primareve, jo vetëm për primaret.
Megjithatë, lista e hapur punon për atë të mbyllur, tjetër absurditet, janë kryer dy grupe, patricët që rrinë dhe plebenjtë që mbledhin vota. Jam dakord me atë që tha Jorida, është sfidë. Ajo ka qenë e përgatitur, nuk ka ndjekur një rrugë, ka ndjekur rrugën e vet në krizën e Partisë Demokratike. Ka ecur duke ruajtur dinjitetin e vet, brenda Partisë Demokratike, ka qëndruar ndryshe, nuk është konformuar.
Nuk ka qenë entuziaste për krizën e partisë dhe për asnjërin prej protagonistëve të krizës. Është përpjekur me mençuri të ecë në një vijë të hollë, në një fije peri dhe ia njoh si meritë”.
