Trafikanti i njohur shqiptar Moisi Habilaj, dy ditë më parë alarmoi autoritetet italiane pas lajmit të bujshëm për arratisjen e tij teksa ndodhej në “Arrest shtëpie”, ndërsa dje janë zbuluar prapaskenat e zhdukjes së tij. Arratisja ka ndodhur pasi Apeli la në fuqi dënimin e tij me 15 vite burg. Ai ndodhej në arrest shtëpie duke pritur vendimin e formës së prerë dhe duke qenë se do të kthehej në burg u arratis. Referuar mediave italiane, banesa në provincën e Katanias në të cilën trafikanti shqiptar ishte duke vuajtur masën e sigurisë “Arrest shtëpie” i përket bosit të Cosa Nostras, e prej këtej hidhen dyshime se Habilaj mund të ketë qenë nën kontrollin e tij. Mësohet se kreu i grupit kriminal që trafikonte drogë nga Vlora në drejtim të Italisë, mbahej në mbikëqyrje me byzylyk elektronik, pasi ishte dënuar me 15.5 vite burg, ndërsa dy ditë më parë kur policia ka shkuar për ta rikthyer në burg, ai nuk është gjetur në banesë.
Këtu hidhen dyshime se në fakt në të vërtetë Habilaj mund të mos jetë pajisur me byzylykun elektronik, nëpërmjet të cilës autoritetet bënin lokalizimin e tij. Kjo me sa duket ka bërë më të lehtë largimin e tij nga ambientet e shtëpisë, duke mos pasur asnjë gjurmë mbi vendndodhjen e tij. Por referuar burimeve të tjera, mësohet se Habilaj mund të ketë humbur gjurmët duke përdorur një argument se do shkonte deri tek dentisti. Kjo alibi është përdorur nga i dënuari shqiptar me 15 vite e 5 muaj burgim në Itali, i cili sot e kësaj dite nuk ka asnjë të dhënë se ku ndodhet. Habilaj, ka mashtruar autoritetet se nevojitej që të shkonte deri tek dentisti dhe më pas është larguar, duke mos u kthyer më në banesën, ku i kishte caktuar gjykata e Katanias për të qëndruar në “Arrest shtëpie”. Ndërkohë, Policia italianë ka marrë kontakte me familjarë dhe vëllanë e Moisi Habilajt. Pas kësaj periudhë Habilaj është zhvendosur në një banesë tjetër, ku prej këtej është arratisur duke përdorur si argument se do shkonte për një vizitë tek dentisti. Strukturat policore në Itali po kryejnë kërkime për lokalizimin dhe arrestimin e tij. Ndërkohë mbrojtësit ligjorë të Nezar Seitajt, një tjetër bashkëpunëtori të Moisi Habilaj, bënë me dije se në muajin nëntor 2020 është larguar nga banesa dhe Seitaj, personi që konsiderohet si “financier” i grupit që drejtonte në Vlorë, Moisi Habilaj.
Ngjarja
Kujtojmë se në 17 dhjetor Gjykata e Apelit në Katania e dënoi me 15 vite burg duke lënë në fuqi vendimin e shkallës së parë. Ndërkohë, mësohet se që prej fundit të majit, ai ishte në arrest shtëpie pas qëndrimit në burg për gati dy vite. Konkretisht Moisi Habilaj u dënua qershorin e kaluar me akuzën e trafikut të drogës nga Shqipëria në Itali, ndërsa së bashku me Habilajn u dënuan edhe dy persona të tjerë të cilët dyshohet të jenë pjesë e grupit, M. Sula dhe N. Seiti. Gjithashtu disa muaj më parë mësohet të jetë arratisur edhe një person i identifikuar me iniciale S. Çela. Ndërsa në 29 qershor të vitit të kaluar GJKKO dënoi me 10 vite burg të arrestuarin e vetëm në Shqipëri që ishte pjesë e grupit të “Habilajve” personin me iniciale A.Kocerri. Ndërkohë referuar ngjarjes mësohet se grupi kryente trafikun e drogës kryesisht nga deti me anë të peshkarexhave. Prokurorët argumentojnë se ky grup, në bashkëpunim me persona të tjerë, ndër ta edhe funksionarë të lartë të Policisë, kanë trafikuar sasi të konsiderueshme lënde narkotike drejt Italisë. Akuza i referohet përgjimeve të grupit të Trablovës, ku i konsideruari si drejtuesi, T.Haxhiraj, në një nga përgjimet dëgjohet t’i thotë bashkëbiseduesit se “çdo gjë bëhet me shtet”, duke lënë të kuptohet se punonjës të policisë kanë dijeni dhe i favorizojnë ata në mënyrë që të ushtrojnë aktivitetin kriminal.
/a.r
