Nuk ka ditë që trajneri i kombëtares, De Biasi të mos japë të paktën 2 intervista për mediat botërore.
Për “Mondo Futbol” De Biasi tregon suksesin me Shqipërinë, pritjen madhështore, të ardhmen, por mbi të gjitha zbulon se çfarë i pati thënë kryeministri Rama pas humbjes me Serbinë.
“Deri në ndeshjen e pestë nuk kishim humbur asnjëherë.
Papritur gjërat u kthyen në drejtimin e gabuar.
Pësuam gol nga Danimarka në fund, humbëm me Portugalinë në shtesë. Në ndeshjen e kthimit me Serbinë u treguam të shkujdesur.
Donim të fitonim patjetër, u çorientuam dhe i “dhuruam” dy gola kundërshtarit në minutat e kohës shtesë.
Pas barazimit me Danimarkën dhe mundjes nga Portugalia e Serbia, Rama më tha se nuk do të na ndiqte më, sepse kishte frikë se mund të na sillte ters.
Nuk ka qenë e lehtë të shkonim në Armeni, sepse të fitosh me çdo kusht nuk është e lehtë.
Kërkuam të mbanim lart përqendrimin, që lojtarët të mos humbnin besimin.
Madje rrezikuam edhe një ndëshkim në minutat e para.
Por në fund ia dolëm dhe unë jam i lumtur që nuk na u dhurua asgjë. Ishim qartësisht më të motivuar se Armenia”tha ai.
