Jeta e zakonshme në një fshat të qetë e të harruar trazohet me ardhjen e tri prostitutave në kafenenë ilegale të dy vëllezërve. Lajmi shpërndahet shpejt dhe prostitutat zgjojnë interesimin e burrave të fshatit, shkruan Koha Ditore.
Mbi këtë rrëfim një ekip filmbërësish nga Kosova, Shqipëria e Maqedonia ka nisur realizimin e filmit “Pranverë e paharruar në fshatin e harruar”. Tash e 26 ditë shesh xhirimi i tyre është fshati Gjonomadh i Korçës.
Ekipi i filmit që është bashkëfinancuar edhe nga Qendra Kinematografike e Kosovës me konkursin e vitit 2013 në kategorinë koproduksion minor, mëton të shfaqë premierën në fillim të vitit të ardhshëm. Mbi 60 aktorë dhe rreth 200 statistë nga rrethi i Korçës janë mobilizuar për xhirimet e filmit. Fotografitë e para të rezultateve veçse janë publikuar në rrjetin social “Facebook”.
E Mumin Jashari, producent për Kosovë dhe xhirues në këtë film, jep detaje shtesë.
“Ne po realizojmë filmin e metrazhit të gjatë artistik me skenar dhe regji të Kushtrim Bekteshit, film ky i bashkëprodhuar mes ‘Media Film Production’ nga Kosova, ‘Manifaktura’ nga Maqedonia me producent Sasho Pavllovskin, ‘Skupi Fest’ me producent Musbajdin Qamilin dhe ‘SkaNdal’ nga Shqipëria me producent Genc Përmetin”, ka shpjeguar Jashari, duke shtuar se “Pranverë e paharruar…” është financuar nga tri qendrat kinematografike, të Kosovës, Maqedonisë e Shqipërisë dhe po mbështetet edhe nga RTK-ja. Xhirimet për filmin kanë nisur në fillim të muajit maj. Faza e xhirimeve pritet të përfundojë më 25 qershor për të vazhduar tutje me montazhin dhe postproduksionin.
“Deri më tani kemi xhiruar 26 ditë dhe xhirimet po shkojnë mirë e sipas planifikimit. Xhirimet po bëhen në fshatin Gjonomadh të Korçës, ndërsa akomodimi i stafit realizues dhe i aktorëve është në Voskopojë”, ka shpjeguar ai.
Sipas Jasharit, ekipi që po realizon filmin “Pranverë e paharruar…” është ndër më të mëdhenjtë mbarëkombëtarë deri më tani.
“Duke filluar nga grupi i roleve të aktorëve profesionistë nga të gjitha trojet kombëtare me 63 aktorë me detyrë dhe deri në 200 statista nga rrethi i Korçës. Gjithë fshati Gjonomadh është mobilizuar në realizim të filmit”, ka thënë ai.
Pjesë e kastës së “Pranverë e paharruar…” janë aktorët Shkumbin Istrefi, Ndriçim Xhepa, Luan Jaha, Ilire Vinca, Vjollca Bekteshi-Hamiti, Osman Ahmeti, Diana Marinova Spasova, Ismet Ramadani, Adriana Matoshi, Shengyl Ismajli, Genta Retkoceri, Donikë Ahmeti, Bujar Ahmeti e të tjerë. “Nga Kosova janë të angazhuar diku 11 aktorë”, ka thënë ai.
Sipas Jasharit, nëse gjithçka shkon sipas planifikimit premiera e filmit “do të jetë në pjesën e parë të vitit 2017”. (b.an)
