Arrestohet në Rinas një nga autorët e grabitje së dyqanit të vajzës së argjendarit të vrarë, Rrapo Sinanaj. Redi Rrjolli, 33-vjeçari nga Shkodra, i cili është dënuar nga Gjykata e Lartë me 4 vjet e 8 muaj burg, është vënë në pranga në aeroportin “Nënë Tereza”, ku ishte kthyer si deportiv nga autoritetet Gjermane.
Rrjolli jetonte prej kohësh në Gjermani bashkë me familjen, por është kthyer për shkak të shkeljes së afateve të qëndrimit të Shengen. Në momentin që po kontrollohej pasaporta e tij, është mësuar se ai ishte person në kërkim pasi nuk e kishte shlyer të gjithë dënimin e dhënë nga Gjykata.
Sipas vendimit të Gjykatës, Redi Rrjolli dhe Klodian Martini, janë shpallur fajtorë për grabitjen e mbetur në tentativë të argjendarisë së Olta Shllakut, ngjarje e ndodhur më 31 tetor të vitit 2012, pranë “Selvisë”, në Tiranë.
Vajza e Rrapo Sinanajt, argjendarit të vrarë nga Viktor Gushi në vitin 2011, përjetoi të njëjtën ngjarje si i ati, e cila fatmirësisht u mbyll pa plumba, por vetëm me grabitjen e floririt në argjendarinë që kishte bashkë me të shoqin.
Dy persona i grabitën Olta Shllakut rreth 1.5 kilogramë flori. Autorët e ngjarjes u vunë në pranga 45 minuta pasi kishte ndodhur grabitja, falë një operacioni mjaft të shpejtë të Policisë së kryeqytetit.
I ARRESTUARI
Redi Rrjolli, 33-vjeçari nga Shkodra i arrestuar si një nga autorët e grabitjes së argjendarisë së Olta Shllakut, rezulton person me një histori të pasur kriminale. Në kohën që ishte i dënuar me 8 vjet burg për një vrasje, kur ishte adoleshent në Shkodër, dënimin për të cilën po e kryente në Burgun e Shën Kollit, në Lezhë, Redi Rrjolli merr edhe një dëmin tjetër shtesë, prej 1 viti e gjysmë, pasi organizon një revoltë në burg.
Por nuk mjaftohet me revoltën dhe bashkë me dy miq që kishte njohur gjatë qëndrimit në burg, Fisnik Matoshin dhe Vladimir Qerimajn, Rrjolli ideon edhe një plan për t’u arratisur nga burgu, të cilin e realizon gjatë natës, më 25 nëntor 2005. Pasi mban me muhabet gardianët derisa ata i zë gjumi, Redi Rrjolli i vjedh çelësin e qelisë njërit prej tyre dhe me atë një çarçafëve arrijnë të kapërcejnë nga 5 metra lartësi, duke kaluar edhe rrethimin e burgut.
Policia vihet në lëvizje për kapjen e të arratisurve dhe i pari që bie në pranga ishte pikërisht Redi Rrjolli. Pasi i kishte marrë me forcë biçikletën një djali që lëvizte në autostradë në drejtim të Lezhës, Rrjolli arrin të bëjë vetëm disa kilometra dhe arrestohet nga Policia që i ishte vënë nga pas. Pasi shlyen dënimin e mbetur, ai arrestohet sërish në vitin 2010 nga Policia e Durrësit, kësaj radhe si person në kërkim për një vrasje të mbetur në tentativë dhe armëmbajtje pa leje.
ETLEVA DELIA
