SHÇBA arreston ish-policin, i cili i mori 1 mijë euro një qytetari duke i premtuar legalizimin e banesës.
Shërbimi për Çështjet e Brendshme dhe Ankesat (SHÇBA) pranë Drejtorisë Vendore të Policisë Durrës, në bashkëpunim me Prokurorinë pranë Gjykatës së Rrethit Krujë, arrestuan ish-punonjësin e Policisë Besim Meçe, 50 vjeç, nga fshati Kameras, Bashkia Manëz.
SHÇBA prej disa javësh ka patur nën hetim Besim Meçen, duke përdorur metodat speciale të hetimit për dokumentimin e veprimtarisë së tij antiligjore.
Ish-polici dyshohet se i ka marrë shumën prej 1000 eurosh një shtetasi, me premtimin se do të ndërhynte për të legalizuar banesën, e cila është në proces legalizimi.
Arrestimi i Meçes u bë me vendim të Gjykatës për akuzën e “Shpërdorimit të detyrës” dhe “ Korrupsionit pasiv“ parashikuar nga nenet 248, 259 të Kodit Penal.
Besim Meçe ishte punonjës policie, me detyrë trupë shërbimi në Komisariatin e Policisë Krujë, por doli në
rezervë në 1 prill 2016 për shkurtim të funksionit organik.
SHÇBA po heton gjithashtu për zbardhjen e rasteve të përvetësimit të parave nga qytetarë të tjerë, prej shtetasit të ndaluar./a.m.