Pranga 18-vjeçares dhe dy “rrëmbyesve” të saj, i kërkuan 400 mijë euro të atit biznesmen
Një skenar si nëpër filma, ku merret peng një person dhe kërkohet shpërblim. Por duket se skenari i sajuar nuk u ka ecur tre të rinjve, të cilët përfunduan në prangat e policisë, mes tyre edhe vajza e personit që donin t’i merrnin paratë, raporton Top Channel.
Burime zyrtare të policisë bëjnë me dije se L. Ç., 60 vjeç ka kallëzuar në polici se ishte telefonuar nga një person i paidentifikuar, i cili i kërkoi 400 mijë euro, duke e kërcënuar se kishte në dorë vajzën e tij të vogël, N. Ç., 18 vjece.
Pas hetimeve të policisë rezultoi se O. H., 18 vjeç dhe K. Gj., 19 vjeç bashkë me vajzën e 60-vjeçarit kishin sajuar rrëmbimin e saj, me qëllim për të marrë shumën e 400 mijë eurove nga i ati.
Të tre të rinjtë kanë përfunduar në pranga.
