Përfaqësues të biznesit francez, ambasadës franceze në Tiranë dhe agrobiznesit shqiptarë organizuan ditët e fundit në Tiranë, për herë të parë një takim të përbashkët pune me investitorë të sektorit agro dhe ekspertë francezë për nxitjen e bashkëpunimit shqiptaro-francez në fushën e agrobiznesit.
Në këtë takim ku merrnin pjesë Ambasadori i Francës në Shqipëri, Bernard Fitoussi, Ministri i Bujqësisë, Edmond Panariti, ekspertë francezë nga Federata Rajonale e CUMA-s, si dhe të ftuar të tjerë, u diskutua për vendosjen e kontakteve të drejtpërdrejta mes përfaqësuesve të shoqatave të biznesit dhe agrobiznesit shqiptar me përfaqësues të kooperativave dhe organizatave prestigjoze në fushën e Agrobiznesit nga Franca.
Pjesa e parë e këtij takimi u fokusua në ekspertizën franceze mbi materialin bujqësor, indikacionet gjeografike dhe blegtorinë, ku referoi, Alain Lançon, përfaqësues i Institutit të Blegtorisë në Paris.
Ai vuri në dukje rëndësinë e zhvillimit të prodhimit dhe produkteve bujqësore e blegtorale autoktone, si elementë të konkurrueshmërisë në treg, ndërsa apeloi për të bashkëpunuar me sektorin agro në Shqipëri në drejtim të teknologjive dhe mjeteve të mekanizuar që janë vlerë e shtuar në prodhim.
Përfaqësues të agrobiznesit shqiptarë, prezantuan zhvillimet dhe perspektivat në sektorin e agrobiznesit dhe atë të bujqësisë në vendin tonë. “Bujqësia dhe agrobiznesi në Shqipëri është konsideruar në vite, si një ndër sektorët prioritar dhe me shumë rëndësi për ekonominë e vendit, i cili ka potenciale dhe resurse ende të pashfrytëzuara. Në këtë kontekst, nënvizuan ata, eksperienca dhe investimet e sipërmarrësve francezë, veçanërisht në sektorin e blegtorisë, peshkimit, prodhimeve bio, etj do t’i jepte një zhvillim bashkëkohor bujqësisë në vendin tonë./a.m.
