Vetëm 1 ndeshje larg historisë. 12 vjet pas asaj finaleje të humbur në shtëpinë e saj ndaj Greqisë, Portugalia do të luajë një tjetër finale Europiani këtë herë me shpresën së në fund do të ngrejë lart trofeun e shumëdëshiruar. Ndaj Francës organizatore të turneut, luzitanët do të kenë një mision shumë të vështirë por Fernando Santos ka besim te skuadra e tij dhe ëndrron që përfaqësuesja që ai drejton, t’i bëjë Francës atë që i bëri Greqia, Portugalisë në 2004-ën.
“Jam tifoz portugez dhe dua të fitoj. Franca gjatë kësaj periudhe ka ndryshuar mënyrën e lojës por edhe ne jemi rritur shumë dhe kemi futbollistë që dinë si fitohet. Ndaj Gjermanisë ata zhvilluan një ndeshje shumë të mirë. Kanë në skuadër individë që bëjnë diferencën por gjithashtu luajnë shkëlqyer edhe në grup. Kam thënë gjithmonë që skuadrat favorite për t’i shkuar deri në fund Europianit ishin tre Gjermania, Spanja dhe Franca. Blutë luajnë në shtëpinë e tyre dhe normalisht janë favoritë por të fitosh është një tjetër gjë. Lexoj dhe dëgjoj që thonë se kjo nuk është finalja më e mirë e mundshme, por dëshirat nga e vërteta ndryshojnë shumë”.
Portugalia është kritikuar për stilin e lojës që ka zhvilluar në këtë kampionat Europian, por Fernando Santos e ka një përgjigje edhe për ata që mendojnë se skuadra e tij ka mbërritur pa meritë në finalen e madhe të St Denis.
“Jemi kritikuar shumë për lojën tonë, por nuk do të vinte keq nëse do të fitonim trofeun, dhe të gjithë do të thoshin që nuk e kemi merituar, kjo do të ishte dicka e mrekullueshme. Thonë që luajmë keq por jemi në finale dhe dua që të gjithë të besojnë te fitorja. Quaresma dhe Ronaldo? Flokët e Ricardos janë fantastikë, një vepër e vërtetë arti. Për Cristianon cfarë mund të them ai është futbollisti më i mirë në Botë”.
Me trajnerin Fernando Santos në konferencën për shtyp ishte i pranishëm edhe qëndërmbrojtësi Pepe. Futbollisti i Realit të Madridit theksoi se kjo ndaj Francës është ndeshja më e rëndësishme për të në karrierë. “Duam të fitojmë për të shkruar historinë” deklaroi në fund të fjalës së tij Pepe.
SS/d.i.
