Kreu i grupit parlamentar të Partisë Socialiste, Taulant Balla, gjatë një prononcimi për mediat, u shpreh se “aleanca e rublave i ka shpallur luftë” projektit të portit turistik të Durrësit. Sipas tij, ky investim është më i madh dhe do të ndikojë në ekonominë e Shqipërisë. Balla theksoi se në lidhje me këtë projekt ka pasur debate në Greqi, pasi opozita atje ka kërkuar shpjegime se pse investimi po shkon në portin e Durrësit dhe jo në atë të Selanikut.
“Mendoj se çdo qytetar shqiptar e kupton qartë që Aleanca e rublave i ka shpallur luftë këtij projekti të madh, më i madhi dhe më i rëndësishmi në histori jo të 30 viteve që kanë shkuar, por edhe të 30 viteve që do vijnë për ekonominë e Shqipërisë. Bëhet fjalë për investimin më të madh të huaj që ka ardhur në Shqipëri. Investim që shkon në 2 miliardë Euro. Synohet të krijohen 12 mijë vende pune. Bëhet fjalë për transformimin dhe vendosjen e Shqipërisë dhe portit të Durrësit si një pikë reference në Mesdhe sa i përket Turizmit. Keqardhja ime është që ndërsa në Kuvendin e Shqipërisë ne diskutonim për procedurën e shqyrtimit në Kuvend të këtij projektligji, koincidenca ndoshta e rastësishme, besoj e rastësishme ishte që në parlamentin e Greqisë, opozita kritikonte qeverinë dhe i kërkonte shpjegime se si ka mundësi që ky investim i madh po shkon te porti i Durrësit dhe jo i Selanikut. Ajo që është e turpshme për opozitën tonë është që opozita jonë kritikon qeverinë se pse e solli”, u shpreh Balla.
Balla tha se pas projektit qëndron qeveria e Emirateve të Bashkuara Arabe.
“Pas investimit kush qëndron? Qeveria e Emirateve të Bashkuara Arabe. Garantori i këtij investimi është Qeveria e Emirateve të Bashkuara Arabe që sa herë më jepet mundësia të flas para jush duhet t’i shprehim mirënjohjen”, u shpreh Balla.
/a.r
