Të tjera detaje dalin në dritë nga vrasja e Suela Sulës, ngjarje për të cilën është arrestuar burri i saj. Në gjykatën e Krimeve të Rënda janë transmetuar sot për herë të parë 5 regjistrimet audio që ishin të regjistruara nga viktima pak muaj para vrasjes. ‘News24’ raporton se Sadetin Sula i dëgjoi i heshtur këto biseda të regjistruara nga bashkëshortja.
‘BalkanWeb’ raporton se në përgjimet audio dëgjohej debati mes çiftit Sula në ambientet e mobilerisë. Sadetin Sula e akuzonte Suelën se djalin e tretë nuk e kishte me të. Fill pas këtij debati, Suela shpërthen ndaj burrit të saj, ndërsa i kërkon atij që të shkojnë në gjykata për të vërtetuar nëse fëmija ishte i tij apo jo, madje në audio dëgjohet edhe se gruaja i kërkon ndarjen. Pasi u zunë, Sadetin i merr telefonin bashkëshortes dhe e fut në xhepin e xhaketës së tij, ndërsa nuk ishte në dijeni që regjistrohej. Lala tha se për 11 orë me radhë telefoni ka regjistruar biseda që komprometojnë të pandehurin se ka urdhëruar vrasjen e gruas së tij, ngjarje që ndodhi në Shkodër.
Në audio dëgjohet dhe një bisedë që Sadetini ka bërë me një person me emrin Fation Karmeshta. Teksa i ankohej për faktin se gruaja nuk i nënshtrohej, Karmeshta i thotë Sadetinit se këtë punë do ta rregullonte ai. Fationi i tha se ‘do ta nënshtroj gruan tënde duke i bërë magji’. Ai i kërkon para në këmbim që gruaja t’i nënshtrohej./BW
