Deputeti i Partisë Demokratike, Ervin Salianji komentoi bllokimin e foltores së Kuvendit ditën e djeshme nga PD si dhe përjashtimin e Bashës nga seanca.
Salianji tha se nuk ka ndodhur më parë që të ketë përplasje për të drejtën e fjalës në Kuvend. Sipas tij, kreu i kuvendit Gramoz Ruci nuk ka lënë opozitën të flasë duke u kthyer pas në kohë.
“Nuk ka ndodhur më parë që të ketë përplasje për të drejtën e fjalës. Mund të ketë pasur për tejkalim të kohës, por jo për të drejtën e fjalës. Shoku Gramoz e ka ngatërruar përudhën dhe mendon se mund ti ndërpresë fjalën opozitës si para 30 viteve. Ne kemi kërkuar që si për çdo akt që kalon në kuvend të kemi diskutime në Kuvend. Regjistrimet kanë ndodhur dhe Ruci i ka pranuar kërkesat e deputeteve, por deputetët e mazhorancës ishin të papërgatitur. Shtyrja e seancës u kërkua nga PD dhe LSI. Nuk ka skandal më të madh se të tentosh të mos lësh opozitën të flasë kjo është e padrejtë. Ruci nuk ka marrë votat tona për zgjedhjen e tij në krye të Kuvendit, por ka marrë kundërshtimin e ashpër të PD.”- tha Salianji në studion e News 24.
Ndër të tjera deputeti i PD, Salianji tha se përjashtimi i Bashës ishte porosi e Ramës.
“Neni 46 i rregullores së Kuvendit thotë se çdo deputet që do të diskutojë për rendin e ditës duhet të regjistrohet në sekretari, dhe ne i kemi regjistruar dhe kemi ndjekur të gjitha hapat procedurale. Unë mendoj se mund të jetë edhe një skenar i Ramës për ta degraduar akoma më shumë dhe për të hequr vëmendjen. Ishte porosi e Ramës dhe sapo nisi diskutimi, Rama tha thuaji që ka mbaruar”- tha Salianji./a.m.
