Deri më tani, dërgesat nga blerjet në internet deri në 145 euro nuk kishin nevojë për zhdoganim dhe posta ta sillte mallin direkt e në shtëpi ose të njoftonte për tërheqjen e tij në sportelet e saj. Të paktën kështu do të vazhdojë të funksionojë edhe për pak kohë, deri në miratimin e ndryshimeve në Kodin Doganor nga Kuvendi. Kur normat e reja të hyjnë në fuqi, nëse malli i kalon 22 euro, për pritësin do të fillojë një “sorrollatje” e vërtetë, që shpesh nuk ia vlen mundimi për vlerën.
Sipas revistës “Monitor”, në pakon e dërguar, dërguesi vë gjithnjë faturën e vlerës së mallit. Me hyrjen në fuqi të vendimit të ri të qeverisë, në momentin që vlera e faturës do t’i kalojë 22 euro ose rreth 25 dollarë, do të fillojë procesi i zhdoganimit. Blerësi duhet të paraqitet në Postë ose në Rinas, varet ku i ka ardhur malli, të plotësojë deklaratën doganore dhe më pas të bëjë pagesën e doganës në bankë. Vetëm pasi të ketë kryer pagesën, mund të bëjë tërheqjen e mallit.
Taksat shtesë përfshijnë Tatimin mbi Vlerën e Shtuar (TVSH) në masën 20% dhe taksën doganore 2.4%, në total 22.4%.
Në mbledhjen e fundit, qeveria vendosi që blerjet online mbi 22 euro të mos kenë përjashtime nga detyrimet e importit, pra të paguajnë TVSH dhe taksë doganore, ndërsa për dhuratat apo dërgesat që qytetarët marrin nga jashtë taksimi fillon nga kufiri 45 euro. Sipas vendimit, përjashtohen nga detyrimet e importit mallrat e blera nëpërmjet porosisë nga interneti, që importohen nëpërmjet dërgesave postare, vlera e të cilave nuk kalon vlerën ekuivalente në lekë të shumës 22 euro, si dhe dërgesat e mallrave nga një individ jashtë për një individ në Republikën e Shqipërisë, të një natyre rastësore, pa pagesë dhe që përmbajnë vetëm mallrat e destinuara për përdorim personal ose familjar prej marrësit, vlera e të cilave nuk e kalon vlerën ekuivalente në lekë të shumës 45 euro.
ma.me
