Shqipëria po prodhon më shumë me më pak njerëz. Nga viti 2011 deri në 2023, PBB-ja është rritur me rreth 80% në vlerë nominale, bashkë me dyfishimin e të ardhurave për frymë, ndërkohë që popullsia, sipas Censit 2023, ka shënuar rreth 2.4 milionë banorë në vend. Me rreth 420 mijë shqiptarë më pak se në vitin 2011 në Shqipëri, shifrat tregojnë një ekonomi që ka zgjeruar prodhimin, por një bazë më të vogël popullsie.
“Ka disa mënyra se si mund të masësh aktivitetin ekonomik në vërtetë ,se sa është masa e popullatës që është aktive në ekonomi. Kjo nuk të thotë ty sa është totalisht popullata në tërësi, por të jep një ndjesi sepse zakonisht minimumi 80% e popullatës angazhohet në aktivitete ekonomike dhe vërtetë po të shikojmë në vitet e fundit kemi një rritje të të ardhurave mesatare në vend edhe si pasojë e rritjes së aktivitetit ekonomik, por edhe si pasojë e faktorëve të jashtëm siç është zhvlerësimi i euros”.
Gjithashtu gjurma e konsumit si ai i energjisë dhe ujit për rreth 755 mijë familje të regjistruara nga Censi 2023, vendoset me rreth 1 milion klientë familjarë të energjisë ose 275 mijë kontrata më shumë se familje. Përtej faktit për banesa të dyta apo prona të emigrantëve, edhe një matematikë e thjeshtuar e mesatares familjare prej rreth 3.2 për familje do ta çonte numrin e popullsisë në vlera më të larta se 2.4 milionë.
“Nga këto më pas ka mënyra se si derivon se sa vërtetë persona janë në Shqipëri”.
Një listë zgjedhësish prej rreth 3.7 milionë edhe kur nuk ishte miratuar votimi për diasporën, i rri po ashtu përballë rreth 2.4 milionë banorëve në vend.
“Nëse vërtetë do të ishim 3.6 milionë siç është numri i votuesve brenda që kryejnë aktivitetin ekonomik në Shqipëri, atëherë edhe niveli mesatar i të ardhurave, por edhe fuqia blerëse do të ishte më e lartë se çfarë na rezulton aktualisht. Numri i banorëve mund të shkonte 3.9 pa frikë, 3.8-3.9 pa frikë dhe do i afrohej më shumë katrës, numri real i banuesve në Shqipëri gjë të cilën si pasojë e aktivitetit ekonomik nuk justifikohet me aktivitetin aktual ekonomik brenda Shqipërisë të kemi këtë lloj numër popullsie”.
Gazetare: Entela Komnino
