Nga Ylli Pata
Ilir Meta shpalli sot nga podiumi i “Partisë së Lirisë” emërimin në një post të lartë të partisë që ai drejton të zonjës Briseida Shehaj, si koordinatore për luftën ndaj korrupsionit.
LSI, siç dihet vdiq një ditë pas ikjes së Ilir Metës nga Presidenca dhe sa hap e mbyll sytë u krijua një parti e re, që nuk kishte lidhje politikisht me forcën që ish-“Bleta Punëtore” e Edi Ramës u largua nga PS për të gjetur një parti ku “socialistët e vërtetë” trajtohen shumë më mirë se në partinë e Edi Ramës. Logjikisht, këtë qëndrim ish-Drejtoresha e Përgjithshme e Tatimeve nuk duhet ta kishte pasur vetëm për vete, por edhe për socialistët e tjerë.
Gjithsesi, këtu çështja më shumë se për sistemim zyrtarësh shtrohesh politikisht. Pasi ish-Drejtoresha e Përgjithshme e Tatimeve në mandatin e parë të Edi Ramës, e më pas zyrtare e lartë në gjysmën e një mandatit të dytë, nuk se ishte një teknokrate me përvojë mbi borderotë dhe regjistrat financiarë të shtetit, por një vajzë e re që kreu një karrierë alla trampolinë. Krejt legjitime si logjikë, madje e vlerësueshme si ambicje për të ecur përpara.
Megjithatë, në këtë rast, nuk bëhet fjalë për një rast por një fenomen, një model, një simbolikë politike që Ilir Meta i sjell “popullit të 2 marsit” i cili është ajo pjesë që nuk ka votuar për Edi Ramën, nuk voton dhe do ta rrëzojë nga pushteti.
Për ta ilustruar këtë fenomen, le të imagjinojmë sikur Ilir Meta me Partinë e Lirisë fiton zgjedhjet dhe vjen në qeveri. Vetë bëhet ose kryeministër ose Zv.kryeministër, dhe një nga zyrtaret e larta të administratës, e nuk është çudi edhe drejtoreshë të Përgjithshme të Tatimeve apo ministre të Financave të jetë zonja Briseida Shehaj.
“Ku është problemi këtu?!” Për t’ju kthyer një batute të ish-zyrtares së lartë që është bërë ikonike edhe në statirat televizive, realisht nuk ka asnjë problem. Megjithatë, politikisht shtrohet pyetja, çfarë do mendojë populli i 2 marsit, ai që nuk ka lënë gjë pa thënë, kur zonja Shehaj ishte e preferuara e Edi Ramës.
Natyrisht bëhet fjalë për rreshtim politik, e jo për zgjedhje kuadrosh në “Partinë e Lirisë”. Kjo parti, apo edhe parti të tjera, mund të riciklojnë dhe afrojnë zyrtarë, mbështetës, propagandistë të Ramës dikur, në një opozitë radikale ndaj tij. Por kjo mund të funksiononte në një betejë brenda të majtës ku LSI e PS bënin garë kush i merr njëra-tjetrës sa më shumë zyrtarë e drejtora. Por ka shumë gjasa, që mbështetës të PL e vetë zonja Shehaj të thotë: “Ku është problemi këtu”? E pyetja në këtë rast nuk do të ishte as retorike, do të mbetej siç është ngjizur si batutë e Portokallisë!
