Nga Dorian Koçi
Zgjedhjet lokale kanë shkaktuar një debat dhe reaksion të natyrshëm në jetën politike të vendit. Akoma pa u zgjedhur kandidatët janë vënë në qendër të vëmendjes për të analizuar çfarëdolloj veprimi apo aksioni politik të pritshëm. Sigurisht që në këto debate nuk ka asnjë gjë të keqe pasi ato janë një pasqyrë e mirë për të mësuar se ç’pret opinioni publik nga kandidatët e përzgjedhur apo se cila do të jetë sjellja e tyre politike në përputhje me projektet dhe premtimet elektorale. Në këtë kontekst është detyra e kandidatëve që herë pas here të japin intervista ku të shpalosin vizionin e tyre dhe të largojnë çfarëdolloj mjegullnaje që përpiqet të shpërndajë gazetaria e papërgjeshme dhe e porositur në horizont për të kaluarën e tyre dhe sjelljen politike të së ardhmes. Gjithsesi sikur mjegullnaja e akuzave që shkëmbehen do mbetej deri në spektrin politik do të ishte e kuptueshme pasi dhe kandidatët si përfaqësues politik nuk mund t’i shpëtojnë tundimit të dyshimeve apo dhe kritikave ndaj tyre, por është për të ardhur keq që debati ditët e fundit po rrëshqet drejt një debati aspak etik dhe profesional.
Në disa shkrime dhe opinione të botuara ditët e fundit është braktisur pothuajse fare profili politik dhe platoformat elektorale që sjellin kanditatët dhe në mënyrë të turpshme po i mëshohet thashethemnajës së zakonshme të akuzve të përbaltjes duke ngatërruar edhe pjesëtarë të familjes, goditje që në stilin ballkanik njihen si burracakëri dhe goditje poshtë brezit. Për më tepër me një cinizëm të paparë që kalon përtej çfarëdolloj norme të etikës ngatërrohen fate njerzore dhe karriera profesionale të së afërmëve të kandidatëve si është rasti i përmendjes së Ajola Xoxës,gruas së kandidatit të PS për bashkinë e Tiranës, Erion Veliaj. Mirëpo nëse këto akuza do mbeteshin vetëm në nivelin amatoresk gazataresk besoj se nuk do kishin pikë rëndësie, po kur ato i bën për vete partia më e madhe e opozitës, atëherë fillon problemi pasi kupton se politika e përbaltjes dhe mungesës së ideve po e shtyn këtë forcë politike në moçalin e zakonshëm të akuzave politike të pabaza. Po përse kjo dashakeqësi kaq e madhe dhe mbi të gjitha një përbaltje e pamerituar për njerëz që janë të sukseshëm në karrierën e tyre profesionale? A thua atyre që denoncuan si rast korrupsioni kërkojnë të vendosin standarte të pastra duke gabuar dhe në logjikë pasi si avokate Ajola Xoxa si e punësuar në një firmë ligjore nuk i zgjedh klientët por përfaqëson vetëm firmën lu është e punësuar, apo ka mbrapa saj interesa të ulta dhe meskine që shiten për profesionalizëm dhe përkujdesje ndaj shtetit. Nuk është e vështirë të kuptosh se në shtypin e shkruar dhe medien vizive ka një kuzhinë që i gatuan të gjitha këto “skoope” gazetareske të panevojshme dhe mbi të gjitha të ulta, dhe lart në politikën e Partisë Demokratike ka kamierë të gattshëm që këtë ushqim të prishur duan ta shesin si ushqim të freskët e kalorik. E vërteta është se opozita shqiptare është e papërgatitur për të përballuar politikisht procesin e zgjedhjes lokale pasi brenda saj nuk ndërmorri një proces kritike dhe ndarje së përgjegjësisë për humbjen e zgjedhjeve në 2013 dhe mbi të gjitha alternativat që afron në të gjitha fushat nuk përfaqësohen nga emra të rinj por nga ata që që për tetë vjet gatuan këtë kaos informaliteti dhe korrupsioni që qeveria e sotme po mundohet ta vërë në rrugë të mbarë. Për çfarë ndryshimi në Tiranë flet kandidati i së djathtës z Halim Kosova, ku kryetari aktual i bashkisë z Basha, nuk ka lënë asnjë gjurmë në mirëadministrimin e qeverisjen e qytetit. Humbja e betejave politike që shikohet në horizont, jo domosdoshmërisht mund të fshihet me mjegullnaja mediatike që tërheqin vëmendjen e opinionit publik nga llogaridhënia dhe aq më tepër këto mjegullnaja nuk mund të shërbejnë për të provokuar situata artifice për të ardhur në pushtet. Analiza e drejtë dhe konstruktive se për se i humb betejat politike do t’i bënte shumë më mirë opozitës sesa politikë përgojimesh të tilla të rëndomta ndaj familjarëve të kandidatëve, pasi vendi ka nevojë vërtetë për një opozitë të fortë për të ecur përpara. Zgjedhjet lokale duhet të mbeten beteja politike të ndershme pa u strukur si struci në rërë pas argumenteve bajate dhe meskine.
