“Në vend se politikanët të mësojnë nga njerëzit e dijes, ata i thërrasin për dëgjueshmëri”, ka vlerësuar historiania serbe Latinka Peroviç, dikur edhe vetë zyrtare e lartë politike në Serbi.
Ajo, siç transmeton qik-u, i ka thënë gazetës “Danas” se kryetari i Akademisë serbe ka thënë të vërtetën në lidhje me pavarësinë e Kosovës, duke theksuar se me atë rast ai ka pasur sjellje të intelektualit të pavarur dhe të përgjegjshëm. Latinka Peroviç për gazetën e Beogradit ka vlerësuar se është e palejueshme që politikanët t’i thërrasin njerëzit e tillë për dëgjueshmëri.
Sipas saj, kryetari i Akademisë, Vladimir Kostiç me deklaratën e tij ka bërë atë që është në traditën më të mirë të Akademisë së Shkencave dhe Arteve të Serbisë, të cilën e ka përkufizuar kryetari i saj i parë Josif Pançiç, i cili ka formuluar domosdoshmërinë që akademikët të mbesin jashtë politikës pikërisht për atë që të mund të jenë arbitër.
