“Ne kemi 10 vjet që paguajmë nga 100 mijë lekë, do të rrënohet një mësues burrë e grua, do të rrënohet shtresa e mesme. Më mirë të kthehemi te vajguri për të shpëtuar”.
Kështu u shpreh në Dita Jonë mëngjesin e së enjtes, deputeti Dashamir Shehi teksa foli për rritjen e çmimit të energjisë elektrike, i cili sipas tij do të prekë edhe shtresën e mesme.
Sa i përket rritjes së çmimit të naftës, Shehi theksoi se kjo ka ardhur si pasojë e politikave abuzive me hidrokarbureve. “Bordi është bërë i çuditshëm. Ky bordi e ul për dy ditë, ndërsa kur e ngre e bën për 7 ditë. Sot jemi njësoj si në vendet e BE, 2 euro, por a mund të paguajë një shqiptar njësoj me një në vendet e BE?! Rritja e çmimeve vjen nga politikat abuzive me hidrokarbureve”.
Për t’i dhënë një zgjidhje kësaj situate, Shehi propozon rritjen e borxhit. Ai thekson se Shqipëria ka marrë borxh pa pasur asnjë arsye, ndërsa në këtë situatë do të ishte zgjidhje.
“Nuk kishim as pandemi e as luftë dhe këta kanë marrë 4 miliardë borxh. Të merret borxh edhe për këtë situatë, që ne të subvencionojmë këtë shtresën e varfër, pasi nuk mbajnë më. Të subvencionojmë biznesin e vogël dhe atë të mesëm, atë që rrezikon të thyhet. Të mbajmë gjallë zinxhirin e punës”.
/a.r
