Qytetarët e Korçës do të përfitojnë tashmë shërbim të plotë e cilësor të kujdesit shëndetësor parësor në Qendrën Shëndetësore të Specialiteteve të kësaj bashkie. Lajmi u bë i ditur gjatë vizitës që zhvilluan sot (016/05/2015) Ministri i Shëndetësisë, z. Ilir Beqaj, dhe Ambasadori Italian në vendin tonë, z. Massimo Gaiani, për të përuruar mbylljen e projektit për rikonstruksionin, furnizimin me pajisje mjekësore dhe mobilimin e këtij institucioni shëndetësor me mbështetjen teknike e financiare të Zyrës së Bashkëpunimit Italian për Zhvillim (Cooperazione Italiana allo Sviluppo).
Ndërhyrja me një vlerë prej 900 mijë eurosh në këtë Qendër Shëndetësore, e cila është pjesë e marrëveshjes së bashkëpunimit ndërmjet Qeverisë Shqiptare dhe asaj Italiane për “Rikonstruksionin dhe pajisjen e 5 Poliklinikave në Tiranë, Korçë, Dibër dhe Gjirokastër” me një vlerë prej 5,080,000 Euro, përfshin rikonstruksionin dhe rehabilitimin e ndërtesës së këtij institucioni, furnizimin me pajisje mjekësore, Radiografi, Radioskopi, ECO të Përgjithshme, Mamografi, shtrat gjinekologjik, kirurgjik e ortopedik, si dhe furnizimin me pajisje mobiljesh, të përfunduara në prill të vitit 2015.
Duke falënderuar popullin mik italian për ndihmën e vazhdueshme për përmirësimin e ndjeshëm të kujdesit shëndetësor, Ministri Beqaj theksoi se “pajisjet e reja mjekësore dhe ristrukturimi i infrasktrukturës së kësaj qendreje shëndetësore është një lajm i mirë për qytetarët e Korçës”, duke shtuar se “tashmë, pas 20 muajsh ne kemi rezultate të prekshme në shëndetësi”.
“Jemi në drejtimin e duhur, jo vetëm për të ofruar Mbulim, Akses dhe Cilësi Universale,” shtoi z. Beqaj, duke theksuar se kjo “do të thotë se, jo vetëm korçarët nuk do të marrin rrugën për në Tiranë pasi mund t’i kryejnë këto ekzaminime dhe shërbime këtu në Korçë, por edhe mjekët e Korçës mund të ofrojnë të njëjtën cilësi shërbimi siç ofrohet edhe në Tiranë”.
Ndërkohë, Ambasadori Gaiani vuri në dukje se kjo ndërhyrje është pjesë e angazhimit të përgjithshëm të ndihmës italiane në sektorin socio-sanitar që arrin vlerën e përgjithshme prej 11 milion euro, duke theksuar se në të njëjtën kohë, “ky është përurimi i dytë që realizojmë brenda pak javësh, dhe kjo ndërhyrje që u mundësua nga Cooperazione Italiana në dy faza, ndihmon për të lehtësuar aksesin e qytetarëve dhe pacientëve për një shërbim më të mirë mjekësor.”
