Ministri i Brendshëm, Besfort Lamallari, ka paralajmëruar të gjithë drejtuesit e mjeteve se mungesa e prezencës fizike të forcave policore në rrugë nuk do të thotë mungesë kontrolli. Përmes një komunikimi në rrjetet sociale, ministri konfirmoi se siguria rrugore po garantohet tashmë përmes një monitorimi të rreptë teknologjik.
“Vërtet mund të mos ketë policë nëpër rrugë, por mjetet inteligjente dhe dronët janë në të gjitha akset nacionale e ato urbane për të kapur shoferët që shkelin rregullat. Syrit të pagabueshëm të teknologjisë nuk i shpëtoni dot,” u shpreh Lamallari.
Teknologjia në shërbim të sigurisë
Në zbatim të strategjisë së re të Drejtorisë së Përgjithshme të Policisë, njësitë rrugore janë pajisur me një arsenal të ri mjetesh si makina inteligjente të afta për të skanuar targa dhe regjistruar shkelje në lëvizje; dronë dhe shpejtësimatës me monitorim ajror dhe matje precize të shpejtësisë në akset kryesore; vëmendje e shtuar në akset që lidhin qendrat urbane me zonat bregdetare, ku fluksi i fundjavës rrit ndjeshëm rrezikun për aksidente.
Bilanci i javës, mijëra gjoba dhe arrestime
Intensifikimi i kontrolleve ka prodhuar rezultate konkrete. Gjatë javës së fundit, Policia Rrugore ka ndërmarrë një aksion masiv në shkallë vendi. Përveç sigurisë rrugore, Ministria e Brendshme bën me dije se Policia e Rendit dhe ajo Kriminale janë të angazhuara në terren për parandalimin e ngjarjeve kriminale, duke u bazuar në inteligjencën informative.
Autoritetet u kanë bërë thirrje qytetarëve që të rrisin bashkëpunimin me strukturat e policisë duke denoncuar çdo paligjshmëri. Fokus i veçantë po i kushtohet edhe qendrave të banuara, ku parkimet e gabuara po ndëshkohen ashpër për të garantuar kalimin e lirë të mjeteve të emergjencës dhe lëvizjen e këmbësorëve në trotuare.
