Ish-kapiteni i kombëtares shqiptare, Lorik Cana nuk po kalon ditë të qeta në Tiranë. Për të dytën herë brenda pak ditësh, futbollisti ka patur probleme me policinë, për shkak të parkimit të makinës.
Në rrjetet sociale po qarkullojnë foto, ku Cana duket teksa bisedon me dy policë përpara banesës së ish-kryeministrit Berisha, pasi kishte parkuar makinën në një vend të palejuar, pranë lokalit ku po drekonte me babanë e tij.
Sipas dëshmitarëve në vendin e ngjarjes, policët i janë afruar makinës së ish-kapitenit Cana për t’i vendosur gjobë, por pas negociatave që zgjatën pak minuta, futbollisti duket se ja ka hedhur pa gjobë dhe ka vijuar drekën me të atin, pa e lëvizur makinën.
Pak ditë më parë, Cana u gjobit nga një police në mes të Tiranës, për parkim të gabuar. Ish-kapiteni i kuqezinjve e kishte lënë “Range Rover”-in e tij me bllokazh ndezur, teksa po blinte diçka në një dyqan pranë rrugës. Qytetarët kanë nxituar menjëherë për të paralajmëruar ish-kapitenin e futbollit, me idenë që po e ndihmonin, por kanë marrë prej tij këtë përgjigje: “Ani nasht, le t’vejn ç’ka t’dun. Keq e kom lan e me këtë rast po e ndihmojmë edhe shtetin shqiptar me pará”, është përgjigjur Cana duke vijuar blerjet pa u shqetësuar aspak. Në makinë me Canën, në momentin e gjobitjes ka qenë edhe bashkëshortja dhe djali i tyre i vogël.
BW/d.i.
