Policia e Vlorës ka dhënë një informacion më të hollësishëm në lidhje me çfarë ka deklaruar para hetuesve, 24-vjeçari, autor i masakrës të ndodhur pasditen e 10 gushtit me 8 të vdekur nga fisi i tij në fshatin Resulaj të Vlorës. Ridvan Zykaj ka pranuar se ka vrarë tetë anëtarët e familjes Zykaj, vëllait të gjyshit të tij, pasi një prej pjesëtarëve e ka akuzuar për vjedhjen e disa pulave.
Grupi hetimor me ekspertë të Policisë Kriminale të Policisë së Vlorës dhe të Departamentit të Policisë Kriminale në bashkëpunim me Prokurorinë e Rrethit Gjyqësor Vlorë, po vijojnë hetimet lidhur me motivin e plotë të krimit të kryer prej 24 vjeçarit në fshatin Resulaj.
Që prej momentit që u shoqërua në ambientet e policisë Vlorë, autori po pyetet në disa seanca nga strukturat policore përkatëse mbi rrethanat e krimit. Nga hetimet e deri tanishme dhe nga deklarimet paraprake të shprehura prej tij, ka rezultuar se e ka kryer aktin kriminal për motive të dobëta, banale. Autori është shprehur se pjesëtarë nga dy familjet Zykaj e kanë akuzuar për vjedhje. Lidhur mbi këtë por edhe në pista të tjera Policia po vijon hetime të imtësishme deri në zbardhjen e plotë të rrethanave të ngjarjes”, njofton policia.
Ridvan Zykaj vrau vëllain e gjyshit të tij së bashku me gruan e moshuar, dy djemtë e çiftit bashkë me nuset e tyre, dhe dy fëmijët e vegjël të njërit prej djemve Zykaj. Ai u arrestua mëngjesin e sotëm pas një operacioni me qindra forca policore, rreth 2 kilometra larg vendit të krimit, i fshehur mes shkurreve dhe me kallashnikovin me plumbat gati për të shtënë.
ma.me
