Policia e Kosovës ka bërë të ditur se më 1 nëntor ka pranuar informacion për një incident në zonën e Leposaviqit, ku një shtetas i Kosovës, i nacionalitetit serb, dyshohet se është plagosur dhe rrëmbyer brenda territorit të Republikës së Kosovës nga xhandarmëria serbe.
Në njoftimin zyrtar, Policia tha se vendi i ngjarjes ndodhet brenda territorit të Kosovës, në një hapësirë të njohur si “pika zero (0)”, afër kufirit me Serbinë.
“Vendi i ngjarjes ku raportohet se ka ndodhur rasti dyshohet se gjendet brenda territorit të Republikës së Kosovës, pra brenda hapësirës [siç quhet pika zero -0-], në afërsi të zonës së Leposaviqit, në mes të Republikës së Kosovës dhe Serbisë, ku për këtë Policia e Kosovës ka njoftuar dhe ka bashkëpunuar me KFOR-in, si përgjegjëse për zonën/brezin kufitar,” – thuhet në deklaratën e Policisë së Kosovës.
Sipas të dhënave të para, viktima është identifikuar me inicialet M.V., dhe sipas dëshmive, ai është transportuar me autoambulancë në drejtim të qytetit të Nishit, në Serbi.
Policia ka konfirmuar se po vazhdon hetimet në bashkëpunim me KFOR-in dhe autoritetet ndërkombëtare, për të sqaruar rrethanat e ngjarjes dhe për të verifikuar pretendimet për ndërhyrje të forcave serbe në territorin e Kosovës.
