Policia shqiptare ka reaguar në lidhje me incidentit e shkaktuar në ndeshjen mes Partizanit dhe Skënderbeut në stadiumin ‘Elbasan Arena’, që u mbyll në barazim.
Policia e Elbasanit thotë se tifozët e Partizanit nisën të hidhnin sende të forta dhe tentuan të kalonin rrethimin, e në këtë pikë kanë ndërhyrë Forcat e Ndërhyrjes së Shpejtë duke qëlluar me shkopinj gome dhe hedhur gaz lotësjellës. Por kjo s’është e para herë që ndodh me tifozët e Partizanit.
Njoftimi i policisë:
Bazuar në shkresën e Futboll Klub Partizani nr. 389, datë 27.10.2016, për marrjen e masave, për garantimin e sigurisë të ndeshjes kombëtare të futbollit, për Kategorinë Superiore midis ekipeve të “K.F. Partizani”, dhe “K.F. Skenderbeu”, që do të luhej më datë 30.10.2016, ora 17:00, në stadiumin “Elbasan Arena”, ju informojme se:
Drejtoria Vendore e Policisë Elbasan hartoi planin e masave për sigurimin e rendit e te qetësisë për zhvillimin normal të ndeshjes kombëtare të futbollit, ndërmjet ekipeve “K.F. Partizani” – “K.F. Skenderbeu.
Sipas njoftimit të dhënë më parë për shtyp, nga ana jonë janë bërë publike masat qe do te merreshin nga Policia.
Gjatë ardhjes së tifozëve të Korçës me autobus, në orën 16:35, në Unazën e qytetit është qëlluar me sende të forta autobusi me targa KO 1750 B, ku është thyer një xham.
Efektivat e Policisë kanë ndërhyrë menjëherë per parandalimin e mëtejshëm dhe kane kryer veprimet e para hetimore dhe proçeduriale, ku kanë identifikuar dy autorët te cilët janë proceduar penalisht në gjëndje të lirë.
Gjatë zhvillimit të pjesës së parë të ndeshjes, nuk pati probleme.Në minutën e 80, rreth 670 tifozë të Partizanit të dislokuar në pjesën C3 të stadiumit, filluan të hidhnin ne fushe fishekzjarre, kapsolla dhe lëndë piroteknike.
Janë këshilluar disa herë me foni nga drejtoria e Stadiumit për mospërdorimin e sendeve të ndaluara, të sharjeve dhe ofendimeve karshi tifozëve të Skëndërbeut.Pas daljes me karton të kuq të lojartit të Partizanit, tifozët e Partizanit, thyen stolat dhe tentuan të kalonin rrethimin me qëllim që të futeshin në fushë.
Forcat e policisë të dislokuara në këtë sektor sipas planit të masave kanë vepruar konform proçedurave standarte sipas instruktazhit të dhënë duke mos lejuar tifozët të futeshin në fushë.
Tifozët kanë vazhduar me thyerjen e stolave duke goditur punonjësit e policisë.Nga këto veprime, janë dëmtuar dy punonjës policie si dhe janë thyer paisjet mbrojtëse të shërbimit të tyre. Kjo situatë, ka zgjatur rreth 10 minuta.
Punonjësit e policisë, kanë dalë në rrethimin e jashtëm duke krijuar një perimetër dhe pas komunikimit të vazhdueshëm, u bë normalizimi i situatës dhe vazhdimi i ndeshjes deri në përfundim të saj.
Nga ana e policisë, janë kryer veprimet proçeduriale, janë shoqëruar 7 shtetas në Komisariat, ndërkohë vijon puna për identifikimin e shtetasve të tjerë
Mbi bazën e deklarimeve të marra, sqarojmë se shtetasi F.B, 24 vjeç, banues në Tiranë është dëmtuar lehtë nga stolat e hedhur nga pjesa tjetër e tifozërisë
Ndërsa shtetasja T.T, 18 vjeçe, banuese në Tiranë, nuk ka patur asnjë lloj dëmtimi, por gjëndje të rënduar emocionale.
Pas kontrollit mjekësor të dy shtetasit, janë larguar pa probleme në banesë
Drejtoria Vendore e Policisë Elbasan po vazhdon punën për kryerjen e veprimeve në bashkëpunim me Prokurorinë e Rrethit Gjyqësor Elbasan.
Materialet do t’i kalojnë Prokurorisë së Rrethit Gjyqësor Elbasan për veprime të mëtejshme për veprat penale “Shkatërrim Prone” , “Prishja e qetësisë publike” dhe “Kundërshtimi i punonjësit të policisë së rendit publik”. (b.an)
